Segir olíufélögin aðeins fá brot af bensínverðinu

„Samsetningin á verðinu er þannig að erlenda verðið og flutningur er 110 krónur. Ríkið er að fá 120 krónur í sinn vasa og innlendir aðilar eru að fá á bilinu 26-27 krónur í sinn hlut," segir Hermann Guðmundsson, forstjóri N1. Hann segir að þetta sé einföld staðreynd sem allir geti reiknað sem kunni slíkan reikning.

Hann gagnrýnir skattlagningu ríkisins. „Það er vond leið hjá ríkinu að keyra upp vöruverð jafn harkalega og gert hefur verið í formi eldsneytis, tóbaks og áfengis vegna þess hvaða áhrif það hefur á neysluverðsvísitöluna," segir Hermann í samtali við Reykjavik síðdegis á Bylgjunni. Hann telur að hreinlegra hefði verið af ríkinu að fara frekar í beinar skattahækkanir með hækkun tekjuskatts því þá hefðu skattahækkanirnar ekki haft áhrif á neysluverðsvísitöluna.

Runólfur Ólafsson, framkvæmdastjóri Félags íslenskra bifreiðaeigenda, hefur sagt að tilefni væri til þess að rannsaka hvort olíufélögin beittu verðsamráði en Hermann vísar slíku samráði á bug. Hins vegar vilji enginn íslenskur eldsneytissali vera með hæsta verðiið því að þá muni kúnninn ekki koma til hans.