Hælisleitendur við höfnina frekar regla en undantekning

Það er regla frekar en undantekning að hælisleitendur reyni að komst um borð í skip sem eru á leið til Bandaríkjanna. Þetta segir upplýsingafullrúi Eimskips. Öryggisverðir félagsins stöðvuðu hælisleitanda við höfnina í morgun með aðstoð hitamyndavéla.

Reykjafoss lagði af stað til Bandaríkjanna í dag. í meðfylgjandi myndskeiði sést skipið sem hælisleitandinn ætlaði með.

Það sem af er þessu ári hefur Eimskip lagt fram sjö kærur til lögreglu vegna hælisleitenda sem brjótast inn á öryggissvæðið, og verður þetta mál það áttunda

Það var rétt upp úr klukkan sex í morgun sem hitanæmar myndavélar Eimskips utan við athafnasvæðið sýndu að þar var maður á ferð. Upptökur úr þessum myndavélum sjást í myndskeiðinu.

Öryggisverðir höfðu hendur í hári hans um tíu mínútum síðar. Hælisleitandinn kom úr hvarfi bak við grjótgarð. Þessi sami hælisleitandi reyndi að komast um borð, síðast þegar Reykjafoss lá við höfn.

„Þetta er í raun meiri regla en undantekning að menn reyni þetta þegar hér eru skip sem sigla vestur um haf," segir Ólafur William Hand, upplýsingafulltrúi Eimskips.

Hann segir að upp úr 2009 hafi Eimskip orðið var við aukinn fjölda hælisleitenda og hafa beint því til innanríkisráðuneytisins að málum hælisleitenda sé betur sinnt.

„Við erum búnir að eyða töluverðum fjármunum í að setja hér upp mjög öflugt myndavélakerfi sem er líklega eitt það öflugasta á landinu," segir hann. Mörg hundruð myndavélar eru á svæðinu.

Yfirvöld í bandaríkjunum hafa fylgst náið með þróuninni og er svo komið að sérstök leit er gerð að laumufarþegum í íslenskum skipum sem koma til Bandaríkjanna sem hefur í för með sér tafir á afgreiðslu varnings.

„Aðrar afleiðingar sem þetta getur haft og þegar hefur komið í ljós er að bandarísk yfirvöld hafi sent íslenskum yfirvöldum bréf þar sem er óskað eftir að við förum upp á vástig 2 - sem þýðir það að hafnarsvæði á landinu þurfa mörg hver að endurskoða sína öryggisgæslu," segir Ólafur þegar hann útskýrir þau vandkvæði sem geta fylgt laumufarþegunum.