Lítill árangur af rannsókn nauðgunarmála úr Eyjum

Rannsókn í tveimur af þeim þremur nauðgunarmálum sem upp komu á Þjóðhátíð í Vestmannaeyjum hefur engan árangur borið. Meintur gerandi hefur hins vegar fundist í þriðja málinu en ekki hefur verið tekin ákvörðun um ákæru.

„Það eru þessi tvö mál sem eru enn óupplýst. Ekkert hefur gefið neina sérstaka vísbendingu í þessum málum," segir Þorgrímur Óli, aðstoðaryfirlögregluþjónn á Selfossi. Fyrir þjóðhátíð var fjölda eftirlitsmyndavéla komið fyrir í dalnum en ekkert grunsamlegt hefur fundist á upptökum þaðan. Málin eru enn til rannsóknar og Þorgrímur telur að enn sé einhver von um að gerandi finnist. „En það fjarar auðvitað undan þessu með tímanum," segir hann.

Í þriðja málinu hefur meintur gerandi fundist. Ákæruvaldið mun meta hvort líkur eru á sakfellingu og ef svo er verður gefin út ákæra.