Sem betur fer ekki mjög algengt að ráðist sé á sjúkraflutningamenn

„Þetta kemur því miður stundum fyrir og það er alltaf jafn dapurt að heyra af svona," segir Jón Viðar Matthíasson, slökkviliðsstjóri á höfuðborgarsvæðinu.

Ölvaður maður sem fallið hafði niður stiga í húsi á Háaleitisbraut í nótt réðst á sjúkraflutningamenn eftir að þeir höfðu búið um sár hans. Handtaka þurfti manninn og vista í fangaklefa.

Jón Viðar segir að svona komi fyrir annað slagið. „Þetta getur gerst í miðbænum eða í heimahúsum þar sem menn halda að aðstæður séu algerlega öruggar. En sem betur fer er þetta ekki mjög algengt," segir hann.

Lögreglumenn fara oft með sjúkraflutningamönnum í útköll. „En það eru alls ekki öll útköll og sem betur fer fá okkar menn oftast að vinna í friði og fá þakklæti fyrir - þeir njóta virðingar hjá flestum þeim sem þeir vinna fyrir. En það eru ákveðnir staðir í bænum sem við vitum að eru vandræðastaðir, og þá fáum við lögregluna með okkur," segir hann.

En hvernig bregðast sjúkraflutningamenn við í aðstæðum sem þessum? „Það er kallað á lögreglu og beðið eftir hjálp. Í sumum tilvikum er reynt að hafa yfirhöndina en yfirleitt er skynsamlegast að draga sig til baka," segir hann.