Mest lesnu erlendu fréttir ársins 2012

Mest lesnu erlendu fréttir ársins á Vísi eru af margvíslegum toga. Þó má segja að fréttir af sviplegu fráfalli Whitney Houston hafi vakið mikla athygli, en hún lést í febrúar. Þá vekur athygli að fólk er enn með hugann við Madeleine McCann sem hvarf í Portúgal fyrir tæpum sex árum síðan. Ekkert hefur spurst til hennar en lögreglumenn telja þó líklegt að hún geti verið á lífi.

1. Gjörsamlega misheppnaðar jólakortamyndir

Mest lesna erlenda fréttin var af ansi skrýtnum jólakortamyndum sem hafa verið sendar. Það er best að hafa sem fæst orð um þá grein, því sjón er sögu ríkari.

2. Framdi sjálfsmorð eftir að hundinum var lógað

Önnur mest lesna frétt ársins er af bandaríska leikaranum Nick Santino, sem framdi sjálfsmorð með því að taka inn of mikið af pillum. Daginn fyrir sjálfsmorðið dó besti vinur hans, hundurinn Rocco.

3. Kafteinn klúður: Myndband sýnir aðgerðarleysi skipstjórans

Þriðja mest lesna fréttin var frásögn af því að myndband sem sýnir viðbrögð skipstjóra skemmtiferðaskipsins Costa Concordia, sem strandaði við Ítalíu um miðjan janúar, hefði verið birt. Á myndbandinu sést að skipstjórinn lætur sér fátt um finnast og fyrirskipar ekki rýmingu skipsins fyrr en löngu eftir að það strandaði.

4. Fundu dularfullan hlut á botni Eystrasalts

Fjórða vinsælasta fréttin er af því að sænskir kafarar sem stunda fjársjóðsleit í Eystrasaltinu hafi rekist á dularfullan hlut á hafsbotninum þar. Einn kafaranna sagði að hann hefði aldrei séð neitt þessu líkt á 20 ára köfunarferli sínum. Í fyrstu töldu kafararnir að þeir hefðu rekist á stórt bjarg á hafsbotninum en við nánari skoðun kom í ljós að hluturinn er gerður úr svampkenndu efni og skagar þrjá til fjóra metra yfir botninum. Eftir því sem Vísir kemst næst liggur ekkert fyrir um það hvers konar hlutur var þarna á ferð.

5. Whitney Houston látin

Fimmta mest lesna fréttin er af andláti söngkonunnar þekktu Whitney Houston. Whitney var ein dáðasta söngkona heims og hlaut fjölda verðlauna fyrir söng sinn. Hún átti lengi við vímuefnavanda að stríða og fór í meðferð í fyrra.

6. Seldi meydóminn á 100 milljónir

Sjötta mest lesna fréttin var af brasilískri konu sem seldi meydóm sinn á netuppboði fyrir tæpar 100 milljónir íslenskra króna. Alls bárust 15 boð í hina tuttugu ára gömlu Catarina Migliorini en það var japanskur karlmaður sem stóð uppi sem sigurvegari. Uppátækið var hluti af heimildarmynd sem ástralskur kvikmyndagerðarmaður hafði unnið að síðustu þrjú ár.

7. Tvíburabræður sýna alheiminn í öllu sínu veldi

Í sjöundu fréttinni var sagt frá tveimur 14 ára tvíburabræðrum sem höfðu sett saman. Kortið vakti mikla athygli á internetinu, en það sýnir alheiminn í öllu sínu veldi, frá hinu minnsta til þess stærsta.

8. Whitney Houston gengin aftur sem draugur

Áttunda mest lesna fréttin var svo frásögn af viðtali Opruh Winfrey við Bobbi Kristina, dóttur Whitney Houston. Bobbi Kristina sagði að mamma sín lægi ekki kyrr í gröf sinni. Hún væri gengin aftur og draugur hennar hefði tekið sér bólfestu á sameiginlegu heimili þeirra mæðgna.

9. Líkur á að Maddie sé á lífi

Níunda mest lesna fréttin snýst um það að Lundúnalögreglan, Scotland Yard, sagði í apríl að enn sé möguleiki á að Madeleine McCann sé á lífi. Tæknideild lögreglunnar opinberaði ljósmynd sem sýnir hvernig Maddie litle myndi líta út í dag, fimm árum eftir að hún hvarf í Portúgal. Madeleine, sem er bresk, hvarf þegar hún var með foreldrum sínum í sumarfríi í Portúgal. Um fá mannshvörf hefur meira verið fjallað á síðari árum en Maddie litlu.

10. Myndband sem tröllríður netheimum – Veist þú hver Joseph Kony er?

Tíunda mest lesna fréttin var frásögn af myndbandi sem gert var til að vekja athygli á gjörðum Joseph Kony í Úganda en hann rænir börnum og gerir þau að kynlífsþrælum og hermönnum. Herferðinni lýkur í lok þessa árs en forsvarsmenn hópsins segja að með því að gera hann "frægan" sé verið að vekja athygli á voðverkum hans. Vonast er til að þessi herferð verði til þess að hann verði að lokum handtekinn. Í myndbandinu er sagt frá Jacob sem var rænt af hersveitum Kony og hann segir Bandaríkjamanni frá verkum hans.