Úðaði málningu á bíla

Lögreglan í Hafnarfirði leitar að skemmdarvargi sem úðaði málningu á bifreiðar við Stórás í Hafnarfirði um miðnætti síðastliðna nótt. Þegar lögreglan kom á vettvang var vargurinn á bak og burt og er hans því leitað. Þá var einnig tilkynnt um rúðubrot á Dalshrauni í Hafnarfirði á svipuðum tíma og bílarnir voru skemmdir.

Sá komst einnig undan. Alls voru níu ökumenn teknir í nótt grunaðir um ölvunarakstur en einn ökumaðurinn er grunaður um að hafa ekið undir áhrifum fíkniefna.

Átján einstaklingar brutu svo með margvíslegu hætti gegn lögreglusamþykkt Reykjavíkur og voru þeir því fluttir á lögreglustöðina á Hverfisgötu þar sem málin voru afgreidd með sektargerð. Mikið var um útköll vegna hávaða og annarra ölvunarláta.