Björn Valur: Lítill stuðningur hlýtur að vera áhyggjuefni

Björn Valur Gíslason, þingflokksformaður Vinstri grænna, segir lítinn stuðning við endurkjörinn forseta hljóta að valda honum áhyggjum. Þannig skrifar hann á bloggsvæði sitt:

„Framboð hans nú var nokkurskonar tilraun hans til að bæta ímyndin sína og endurskrifa söguna sér í vil. Það tókst ekki. Helmingur þjóðarinnar er ósáttur við forseta sinn, vill hann frá. Það undirstrikar klofninginn meðal þjóðarinnar sem forsetinn sjálfur átti ekki svo lítinn þátt í að skapa í aðdraganda hrunsins. Tilraunin mistókst – skiljanlega."

Og Björn Valur heldur áfrarm: „Forsetinn hefur nánast boðað að hann muni afnema þingræði í landinu þegar honum sýnist svo. Hann hefur í aðdraganda kosninganna talað þannig um stjórnskipan landsins að rétt er að hafa verulegar áhyggjur af. Samt stígur enginn fram sem þjóðin getur gert að sameiningartákni sínu sem forseta landsins.Hvernig ætli standi á þessu?"

Björn Valur segir það einnig áhyggjuefni hversu dræm kjörsóknin var í forsetakosningunum. Aðeins 69 prósent þjóðarinnar sá ástæðu til þess að mæta á kjörstaði og kjósa sinn fulltrúa. Björn Valur veltir fyrir sér mögulegum ástæðum fyrir þessari dræmu kjörsókn, „kannski voru frambjóðendurnir að þessu sinni ekki bara nógu spennandi til að kveikja neistann sem til þurfti til að streyma á kjörstað?" skrifar hann meðal annars á bloggið sitt.