Fimmtíu manns leituðu að konunni sem aldrei týndist

Mannleg mistök urðu til þess að umfangsmikil leit að erlendri konu stóð yfir í meira en hálfan sólarhring í gær. Leitinni var hætt þegar í ljós kom að konan var ekki týnd heldur hafði verið oftalið rútuna sem hún hafði ferðast með.

Það var skömmu eftir hádegi í gær sem að bílstjóri áætlunarbifreiðar tilkynnti lögreglu að erlend kona sem verið hafði á ferð með honum væri saknað. Konan hafði ekki skilað sér aftur í rútuna eftir að hafa farið úr henni við Eldgjá sem er skammt frá Skaftafelli. Leit var strax hafinn að konunni og björgunarsveitir kallaðar til.

„Það er leitað í allan gærdag og fram á kvöld og við bætum svo við fleiri sveitum þegar líða fer á kvöldið. Því að það náttúrulega fer að skyggja," segir Sveinn Kristján Rúnarsson, yfirlögregluþjónn á Hvolsvelli.

Alls tóku um fimmtíu manns þátt í leitinni. Óskað var eftir aðstoð Landhelgisgæslunnar en vegna veðurs var ekki hægt að senda þyrlu hennar á svæðið. Þegar ekkert hafði enn sést til konunnar um klukkan þrjú í nótt var farið að skoða málið betur.

„Þegar er búið að fara vel yfir svæðið þá förum við að fá svona ákveðna bakþanka með leitina og leggjumst betur ofan í fjöldatölur og talningar úr bílnum og í og úr bílnum. Þá sjáum við það í rauninni að það hefur verið oftalið í bílinn. Þannig að hún hefur í rauninni ekki verið týnd þessi kona," segir Sveinn. „Þetta eru í rauninni bara mannleg mistök í sjálfu sér. Það er svo sem ekki hægt að hengja það á neitt annað."

Í ljós kom að konan hafði farið úr jakka og tekið af sér sjal á meðan hún brá sér úr rútunni við Eldgjá. Bílstjórinn þekkti hana ekki þegar hún kom til baka og taldi því að hún hefði ekki skilað sér aftur í rútuna og væri týnd. Konan var hins vegar allan tímann í hópi ferðamannanna sem ýmist hófst við í rútunni á meðan á leitinni stóð eða aðstoðuðu við hana. Hún áttaði sig ekki á því að hún væri sú sem verið væri að leita að.

„Menn voru náttúrulega fegnastir því að það væri skyldi enginn vera týndur úti í myrkrinu það var nú eiginlega það sem menn voru ánægaðstir með að það skyldi ekki vera. Svo reynum við nú bara að sjá ljósu punktana í þessu. Þetta er líka góð æfing fyrir kerfið. Við erum með öflugt og gott björgunarsveitakerfi hérna og við sjáum það vel í svona að það virkar vel og allir reiðubúnir að leggja á sig það sem til þarf," sagði Sveinn Kristján Rúnarsson yfirlögregluþjónn á Hvolsvelli.