Lærði ekki stanslaust en fékk samt hæstu einkunn frá upphafi

Þorsteinn Kristinsson útskrifaðist með hæstu einkunn sem gefin hefur verið fyrir BA-próf í stjórnmálafræði við Háskóla Íslands á sunnudaginn var.

Þorsteinn hlaut 9,39 í meðaleinkunn sem verður að teljast glimrandi árangur. Hann gerir ráð fyrir að þessi lokaeinkunn muni opna fyrir honum ýmsar dyr, til að mynda auðvelda honum að komast í framhaldsnám við virta háskóla erlendis.

Eftir að hafa afgreitt BA-námið með þessum aðdáunarverða hætti ætlar Þorsteinn að hvíla stjórnmálafræðina í bili. „Ég er búinn að skrá mig í kínversku í HÍ á næsta ári," segir hann. Fram að hausti mun Þorsteinn hins vegar vinna sem aðstoðarmaður prófessors við Háskóla Íslands. Þar mun hann aðstoða við rannsóknir í stjórnmálafræði.

Jafnvel þó Þorsteinn sé orðinn svona sprenglærður í stjórnmálafræði getur hann þó ekki gert upp hug sinn fyrir forsetakosningarnar í vikunni. „Ég vildi ég hefði svar við því [með hverjum hann heldur] en ég hef það ekki," segir hann.

Aðspurður vill Þorsteinn ekki kannast við að hafa lært stanslaust til að ná þessum árangri. „Nei, galdurinn er bara að lesa heima, mæta í tíma og hafa gaman af því sem maður gerir."