Sparnaðartillögum mótmælt - lítill ávinningur

Vinstri græn í borgarstjórn Reykjavíkur gagnrýna harðlega framkomnar sparnaðartillögur í skólamálum borgarinnar. Að mati flokksins er faglegur ávinningur af tillögunum vart til staðar og þá er gagnrýnt að þarfagreining hafi ekki verið gerð. Þá eru markmið óskýr að mati VG og rökstuðningur ófullnægjandi.

„Niðurstöður starfshóps um greiningu tækifæra til samrekstrar og/eða sameiningar leikskóla, grunnskóla og frístundaheimila sýna að fjárhagslegur ávinningur verður lítill sem eykur enn á efasemdir um réttmæti aðgerðanna," segir í yfirlýsingu frá VG. „Engu að síður fer meirihlutinn sínu fram, þvert gegn athugasemdum frá fagfólki, foreldrum og fulltrúum minnihlutans sem hafa verið settar fram bæði á faglegum forsendum en eins með sanngirnisrök að leiðarljósi. Ákefðin er svo mikil að ekki var fallist á að gefa kjörnum fulltrúum vikufrest til að kynna sér tillögurnar til hlítar heldur haldið áfram á sama hraða og einkennt hefur ferlið allt."

Ámælisverð áform

„Að ósk Vinstri grænna var þó fallist á að leita umsagna fagfólks og hagsmunaaðila, m.a. frá Menntavísindasviði HÍ, Félagi grunnskólakennara, Félagi leikskólakennara, Skólastjórafélagi Íslands, Félagi stjórnenda leikskóla, Félagi fagfólks í frítímaþjónustu, Þroskaþjálfafélagi Íslands, Jafnréttisstofu, Samfok, Þroskahjálp og Börnunum okkar. Eins var óskað eftir lögfræðiáliti Menntamálaráðuneytis á því hvort breytingarnar stæðust bókstaf og anda þeirra laga sem unnið er út frá," segir enn fremur.

Þá segir að áform meirihlutans séu í hæsta máta ámælisverð. „Þau grafa ekki aðeins undan faglegri þjónustu við börn, heldur endurspeglast í þeim vanvirðing við þá fagþekkingu og uppbyggingarstarf sem hefur verið unnið af hálfu uppeldisstétta í áranna rás. Fögur fyrirheit um fagmennsku og virðingu fyrir sérkennum ólíkra stofnana standast ekki, enda munu breytingarnar leiða af sér aukna einsleitni og meiri áherslu á rekstur á kostnað faglegrar framþróunar. Að sama skapi munu breytingarnar stuðla að afturför hvað varðar stöðu og þátttöku kvenna á vinnumarkaði, sem er í hrópandi andstöðu við aukna meðvitund samfélagsins í jafnréttismálum og stefnu meirihlutaflokkanna tveggja."

„Það er einörð afstaða Vinstri grænna að útfæra verði hagræðingu á öllum öðrum sviðum borgarinnar og í stjórnkerfinu áður en snert er við þessari allra viðkvæmustu þjónustu borgarinnar. Þau einstrengingslegu og öfugsnúnu vinnubrögð sem nú eru viðhöfð vekja upp spurningar um hæfi meirihluta Besta flokks og Samfylkingar til stefnumótunar og forgangsröðunar á fjármunum og verkefnum fyrir hönd borgarbúa," segir að lokum.