Djokovic sá við Federer

Serbinn Novak Djokovic gerði sér lítið fyrir og sló Roger Federer úr leik í undanúrslitum á opna ástralska meistaramótinu í tennis í þremur settum.

Federer bar sigur á býtum á þessu móti í fyrra en hann mátti þola tap gegn Djokovic í dag. Sá serbneski vann, 7-6, 7-5 og 6-4.

Djokovic sló Federer einnig úr leik á opna bandaríska mótinu í haust en þessir kappar mættust sömuleiðis í undanúrslitum á opna ástralska árið 2008. Þá vann Djokovic einnig, 3-0.

Það var einmitt þá sem að Djokovic vann sitt eina stórmót í tennis á ferlinum til þessa. Hann vann Frakkann Jo-Wilfried Tsonga í úrslitum.

Hann mætir nú annað hvort Andy Murrary eða David Ferrer í úrslitum en sá síðarnefndi sló út Rafael Nadal, efsta mann heimslistans, í fjórðungsúrslitum í gær. Federer er í öðru sæti heimslistans.

Sú úrslitaviðureign verður sú fyrsta á stórmóti í þrjú ár þar sem hvorki Nadal né Federer eru að spila til sigurs.

Federer byrjaði reyndar betur í viðureigninni í morgun en Djokovic hafði betur í oddalotunni, 7-3.

Federer komst svo í 5-2 forystu í öðru setti en þá snerist leikurinn algjörlega Djokovic í hag. Hann vann næstu fimm lotur, þar af þrjár þar sem Federer átti uppgjöf, og kláraði settið 7-5.

Hann kláraði svo verkefnið í þriðja settinu þrátt fyrir að Federer hafi gert sitt allra besta til að koma sér aftur inn í viðureignina. Það tókst ekki.

Murray og Ferrer mætast í síðari undanúrslitaviðureigninni á morgun um klukkan 8.30. Hún verður í beinni útsendingu á Eurosport.