Má ekki verða að fordæmi

Titringur er innan íslenska landsliðshópsins í handbolta, aðeins nokkrum dögum áður en heimsmeistarakeppnin hefst í Brasilíu, vegna atvinnumissis Guðnýjar Jennýjar Ásmundsdóttur, markvarðar liðsins og leikmanns Vals. Guðný Jenný missti vinnu sína í Nýherja, þar sem hún hafði starfað í fjögur ár. Ástæðan er að hún valdi landsliðið og HM í Brasilíu fram yfir tilboð um stöðuhækkun hjá fyrirtækinu.

Málið kom upp í september, en það var Fréttatíminn sem greindi fyrst frá þessu í gær. Samkvæmt heimildum Fréttablaðsins eru félagar hennar í íslenska landsliðinu furðu lostnir yfir þessu máli og formaður HSÍ, Knútur Hauksson, hefur lýst yfir óánægju sinni vegna þessa.

„Við eigum allt okkar undir því að fólk sem er að keppa fyrir hönd Íslands í okkar þjóðaríþrótt öðlist skilning frá sínum vinnuveitanda fyrir svo stór verkefni eins og heimsmeistaramót," segir Knútur, en kvennalandslið Íslands er nú að keppa á sinni fyrstu heimsmeistarakeppni frá upphafi.

Hann segist ekki geta svarað fyrir það hvernig fyrirtæki hagi sínum málum en svona lagað hafi aldrei komið upp áður, hvorki í sögu karla- né kvennalandsliðsins.

„Ég minni á að handboltafólk og íþróttafólk almennt er fólk sem er gott í vinnu. Það er reglusamt og mikið keppnisfólk," segir Knútur og bætir við: „Þetta mál er okkur mjög mikilvægt því þetta má ekki vera fordæmisgefandi."

Upphaflega fékk Guðný Jenný tilboð um stöðuhækkun í september síðastliðnum, gegn því að hætta í landsliðinu. Heimildir Fréttablaðsins herma að eftir að hún hafnaði boðinu var annar ráðinn í stöðuna og með því fækkaði verkefnum fyrir Guðnýju Jennýju það mikið að ákveðið var að segja henni upp. Nýherji sendi frá sér yfirlýsingu í gær sem uppsögn hennar sé aðeins vegna hagræðingar á krepputímum, eins og það er orðað.

Nýherji er þrátt fyrir allt einn stuðningsaðila kvennalandsliðsins í handbolta og þarf Guðný Jenný, eins og aðrir leikmenn liðsins, að spila með auglýsingu frá fyrirtækinu þegar hún klæðist íslenska landsliðsbúningnum.

Knútur sagði við Fréttablaðið að stjórn HSÍ hefði ekki hist til að ræða þann möguleika að rifta samstarfi við Nýherja vegna málsins. Þó hefðu fulltrúar handknattleikshreyfingarinnar fundað með forsvarsmönnum Nýherja en án þess að finna lausn á málinu.

„Þeir hafa skýrt okkur frá sinni hlið á þessu máli. Við erum ekki sammála þeirra málflutningi en þeir verða að fá að taka sínar ákvarðanir," sagði Knútur.

Hann hafði ekki tekið afstöðu til þess sjálfur hvort hann teldi rétt að rifta samningum við Nýherja. Guðný Jenný gaf sjálf ekki kost á viðtali í gær.