David Cameron, forsætisráðherra Bretlands, kallaði þjóðþing landsins saman á neyðarfund í gær til að ræða hleranamálið, sem hefur ekki aðeins grafið undan trausti fólks á fjölmiðlaveldi Ruperts Murdoch, sem kannski var þó eitthvað takmarkað fyrir, heldur einnig til bresku lögreglunnar og forsætisráðherrans sjálfs.
Tíu manns hafa verið handteknir vegna málsins síðan í byrjun apríl, bæði vegna rannsóknar á símahlerunum blaðamanna fjölmiðlasamsteypunnar og vegna rannsóknar á því hvort breskir lögreglumenn hafi þegið fé frá fjölmiðlum Murdochs í skiptum fyrir upplýsingar.
Tveir æðstu yfirmenn bresku lögreglunnar, þeir Paul Stephenson lögreglustjóri og John Yates, yfirmaður hryðjuverkadeildar lögreglunnar, hafa sagt af sér í tengslum við málið. Þeir báðir hafa verið ásakaðir, ásamt tveimur öðrum yfirmönnum lögreglunnar, um brot í tengslum við hleranir blaðamanna News of the World.
Stephenson er meðal annars gagnrýndur fyrir að hafa ráðið Neil Wallis, fyrrverandi ritstjóra News of the World, til ráðgjafarstarfa hjá lögreglunni og Yates fyrir að hafa útvegað dóttur Wallis starf.
Hlutabréf í News Corp, fjölmiðlasamsteypu Ruperts Murdoch hafa fallið töluvert í verði vegna málsins og ítök hans í stjórnmálaheiminum í Bretlandi hafa dvínað mjög, að minnsta kosti tímabundið.
Rebekah Brooks, sem lengi hefur verið hægri hönd Murdochs, var handtekin á sunnudag en látin laus þá um kvöldið gegn tryggingu. Hún sagði af sér fyrir helgi sem framkvæmdastjóri News International, undirfyrirtækis News Corp, sem gefur meðal annars út blaðið News of the World.
Hún á að mæta í dag ásamt feðgunum James og Rupert Murdoch fyrir breska þingnefnd þar sem til stendur að fara ofan í saumana á málinu, sem hefur haft víðtæk áhrif á bresk stjórnmál ekki síður en fjölmiðlaheiminn.
Meðal annars sætir David Cameron vaxandi þrýstingi fyrir að hafa ráðið annan fyrrverandi ritstjóra sama blaðs, Andy Coulson, til að vera upplýsingafulltrúi hans.
Ed Miliband, leiðtogi stjórnarandstöðunnar, segir Cameron þurfa að svara erfiðum spurningum um tengsl sín við Murdoch, Brooks og Coulson.
„Sem stendur virðist hann ófær um að veita þá stjórnarforystu sem landið þarfnast," segir Miliband, sem er leiðtogi Verkamannaflokksins.
gudsteinn@frettabladid.is
Stjarnan
Valur
