Fálmkennd viðbrögð Camerons vegna hlerunarhneykslisins

Forsætisráðherra Bretlands er undir miklum þrýstingi eftir að tveir hæst settu lögregluforingjar landsins sögðu af sér vegna hlerunarhneykslisins þar í landi. Breska þingið mun fresta því að fara í sumarfrí.

Breskir fjölmiðlar fóru í dag óblíðum höndum um David Cameron, forsætisráðherra, sem er í opinberri heimsókn í Suður-Afríku. Afsagnir lögreglustjóra og aðstoðarlögreglustjóra Scotland Yard vegna hlerunarmálsins valdi því að sjálfur forsætisráðherrann sé orðinn skotmark.

Cameron leggur sig allan fram við að fullvissa breskan almenning að ekkert verði dregið undan við rannsókn málsins. „Nú þarf að tryggja að lögreglan í Lundúnum vinni hratt og örugglega svo ekkert fari á milli mála í þessari mikilvægu rannsókn á því sem átti sér stað á fjölmiðlunum og innan lögreglunnar."

En ýmsum þykir sem Cameron hafi sýnt veikleika eftir að málið kom upp. Ivor Gaber, prófessir í fjölmiðlafræði, segir stöðu forsætisráðherrans ekki vera góða. „Viðbrögð hans síðustu vikuna eða svo hafa verið fálmkennd og leiðtogar Verkamannaflokksins eru meira í takt við almenningsálitið."

Það sem einkum er fundið að við Cameron er að hann réði fyrrverandi ritstjóra News of The World sem fjölmiðlafulltrúa sinn í Downing stræti 10. Það var að vísu löngu áður en þetta mál kom upp. Lögreglan þykir hafa unnið slælega að málinu en teygir anga sína allt aftur til ársins 2000. Þá hafa lögreglumenn einnig verið sakaðir um að hafa þegið mútur.