Stöndum hvert með öðru

Ekki fyrir löngu voru vorjafndægur og við flest hugsum okkur gott til glóðarinnar þegar fer að birta og veður að breytast til hins betra. Það er þó rétt að benda á að mars-mánuður er oft mjög erfiður vegna þess að snjólega séð er engu líkara heldur en að risafoss gangi fram í nokkrar vikur og svo komi eins og stöðuvatn í kjölfarið sem verður lygnara eftir því sem líður á.



Það er ótrúlega margt að gerast í okkar ágæta samfélagi og nú standa fyrir dyrum eftir nokkra daga, svokallaðar IceSave-kosningar. Ég er algjörlega mótfallin því að við borgum fyrir dómgreindarlausa, siðblinda og hrokafulla einstaklinga sem víluðu sér ekki við að fara með fé Íslendinga hingað og þangað um heiminn og fannst það í lagi. Ég vil benda á ef að ég fæ símareikning minn inn um mína lúgu þá fer ég ekki með hann í næsta hús og heimta að konan þar borgi í hennar óþökk, geng svo í burt og finnst þetta í lagi. Ég fengi væntanlega á mig kæru og yrði látin borga reikninginn minn hvort sem mér líkaði betur eða verr, annars fengi ég jafnvel dóm á mig. Að sama skapi á að láta þá sem eru ábyrgir greiða fyrir syndir sínar, ekki saklausa borgara.



Vegna atburðanna með nokkurra vikna millibili á Fimmvörðuhálsi og Eyjafjallajökli fengu margir Íslendingar áfall vegna jarðskjálftanna í t.d. Japan að undanförnu. Ég vil benda á að þó alltaf sé jafnerfitt að takast á við afleiðingar svona alvarlegs jarðróts og hræringa í heiminum þá er munurinn á íslenskum jarðhræringum og þeim japönsku eða víðar, eins og munurinn á milli hvals og fálka þó tölurnar séu svipaðar. Það er ólíklegt að við fáum svipaða skjálfta hér. Við megum því vel við una í okkar vanda þótt vandi sé alltaf erfiður.



Það er furðulegt hvað gengið hefur á í heiminum á mjög stuttum tíma og þjóðinni er fullkunnugt um. Það eru erfiðleikar í Miðausturlöndum, Asíu og Afríku og víðar. Mikil veraldleg og úthugsuð mannleg átök eru í gangi sem eiga upphaf sitt hjá fólki en ekki náttúru. Ég vil bara segja að lokum að það er greinilegt að fólk þarf að átta sig á því meira nú en nokkru sinni áður, þar sem upplýsingaöldin er algjör, að við þurfum að standa hvert með öðru og trúlega breyta á einhvern hátt viðhorfum okkar til alheimsins og ýta kannski frekar undir réttsýni, lítillæti, auðmýkt og trú, heldur en hroka, yfirgang, siðblindu og trúleysi.