„Við erum ekki í stríði við neinn," segir Einar „Boom" Marteinsson, formaður vélhjólaklúbbsins MC Iceland, sem lögregla óttast að muni innan skamms lenda í átökum við annan vélhjólaklúbb, Black Pistons, sem starfræktur er hér á landi. Black Pistons er opinber áhangendaklúbbur vélhjólasamtakanna Outlaws og klúbburinn hér var stofnaður af Jóni Trausta Lútherssyni, forvera Einars á formannsstóli MC Iceland, áður Fáfnis.

Einar undrast í samtali við Fréttablaðið að yfirvöld kalli klúbbinn skipulögð glæpasamtök þótt enginn dómur hafi fallið á hann. Hann vill þó ekkert segja frekar um málið.
Lögregla fullyrðir að meðlimir MC Iceland muni um helgina fá fullgildingu sem liðsmenn Hells Angels, eða Vítisengla, og að athöfnin muni fara fram í Ósló. Einar vill hvorki tjá sig um það né hvort þeir séu á leið utan. - sh