Tínum ekki 2-3 milljónir upp af götunni

Almar Guðmundsson, formaður knattspyrnudeildar Stjörnunnar, segir mikla fjármuni í húfi fyrir félagið í tengslum við sölu Veigars Páls Gunnarssonar frá Stabæk til Vålerenga fyrr á þessu ári. Til greina komi að fara með málið í gegnum Knattspyrnusamband Evrópu, UEFA.

Forsaga málsins er sú að Veigar Páll var seldur frá Stabæk til Vålerenga í ágúst síðastliðnum. Uppgefið kaupverð var ein milljón norskra króna þó svo að Rosenborg hafi sagst vera reiðubúið að greiða fimm milljónir fyrir kappann.

Síðar kom í ljós að með í kaupunum á Veigari var kaupréttur á fimmtán ára gutta, Herman Stengel, sem var metinn á fjórar milljónir króna.

Eftir að Veigar Páll gekk aftur í raðir Stabæk frá franska félaginu Nancy árið 2009 var samið um að síðarnefnda félagið fengi helming af kaupverðinu ef Veigar Páll yrði seldur áfram frá félaginu.

Með því að selja Veigar til Vålerenga fyrir eina milljón í stað fimm milljóna til Rosenborg er ljóst að Stabæk sparaði sér tvær milljónir norskra króna, um 41 milljón króna, með gjörningnum.

Þar sem Stjarnan og KR eiga rétt á uppeldisbótum fyrir Veigar Pál, ákveðið hlutfall af söluverði hans, voru þau félög einnig hlunnfarin af þessum viðskiptum.

Norska knattspyrnusambandið hefur þegar sektað félögin og bannað þeim sem sáu um söluna að hafa afskipti af knattspyrnu í ákveðinn tíma. En talið er að málið geti vel endað sem lögreglurannsókn og farið fyrir dómstóla. „Við fengum greitt miðað við þessa einu milljón sem Veigar Páll var sagður kosta Vålerenga,“ sagði Almar. „Og nú þegar búið er að beita sektum er komin viðurkenning á að verðmiðinn var annar en gert var opinbert á sínum tíma. Við teljum að við eigum þar með kröfu á norsku félögin.“

Stjarnan og KR hafa fyrst og fremst verið í samskiptum við norska knattspyrnusambandið og bíða nú átekta. „Við erum háðir framvindu málsins í Noregi. Við höfum líka þann úrskost að leita til UEFA og gerum það ef við teljum ástæðu til. Það eru 2-3 milljónir í húfi fyrir okkur og maður tínir ekki þann pening upp af götunni. Við fylgjum þessu eftir.“