Segir óþarfi að hækka útsvarið og að borgin standi vel

Útsvarið í Reykjavík verður að öllum líkindum hækkað til að hægt verði að veita frekara fé í skólana. Fallið hefur verið frá áformum um að draga úr gæslu og námi í grunnskólum. Hundruð mótmæltu við Ráðhúsið í dag.

Í hádeginu var greint var frá því að ekki yrði af fyrirhuguðum niðurskurði á kennslu og gæslu í grunnskólum borgarinnar. Foreldrar og kennarar grunnskólabarna höfðu harðlega mótmælt þeim hugmyndum. Formaður menntaráðs segir að komið hafi í ljós að staða grunnskólanna hafi verið mun verri en talið var og niðurskurður þar frá bankahruni svo mikill að ekki hafi verið hægt að gera meira. Frekar verði að veita meira fé í þessa þætti.

„Tölurnar liggja ekki fyrir en við teljum að þetta séu allt að 200 milljónir króna fyrir næsta haust og þá erum við að bæta verulega í varðandi gæsluna og forföllin og draga til baka skerðingu á kennslumagni," segir Oddný Sturludóttir, formaður menntaráðs.

En von er á stórum árgöngum leikskólabarna og bara á næsta ári er talið að þeim muni fjölga um 400. Það verður að taka á móti án þess að byggð séu ný hús. Til að taka á móti þeim segir Oddný að til standi að nýta betur það húsnæði sem borgin á og er ekki nægilega vel nýtt. Til dæmis með því að sameina leikskóla og grunnskóla.

Hanna Birna Kristjánsdóttir, borgarfulltrúi sjálfstæðismanna segir að ekki þurfi að hækka útsvarið til að bæta stöðu í kennslu og gæslu í grunnskólum. „Það sem mér finnst skipta mestu máli í þessu og vekur miklu furðu er það að menn ætla að ganga núna til þeirra verka að hækka skatta til að koma til móts við þetta á sama tíma og Reykjavíkurborg á 660 milljónir í óráðstafað fé. Borgin stendur vel," segir Hanna Birna.

Sjálfstæðsmenn segja að erfitt að skilja hvers vegna þurfi að hækka gjöld á borgarbúa, útsvar og skerða þjónustu sem bitni á borgarbúum en á meðan megi ekki snerta á yfirstjórninni.

„Við reyndum að koma í veg fyrir að hækka útsvarið en skyldum samt eftir þann möguleika að við gætum neyðst til að fullnýta það," segir Jón Gnarr, borgarstjóri.