Aukin framlög til að verja kennslustundir

Skólamál Borgaryfirvöld hafa ákveðið að auka fjárheimildir til grunnskólastarfs í borginni um 200 milljónir króna frá því sem gert var ráð fyrir í fjárhagsáætlun borgarinnar fyrir yfirstandandi ár. Til greina kemur að fullnýta útsvarsheimildir til að mæta auknum kostnaði.

Oddný Sturludóttir, formaður menntaráðs, segir að með þessu sé tryggt að ekki þurfi að skerða kennslu eða innra starf grunnskóla. „Við skoðuðum stöðuna og sáum að uppsafnaður vandi síðustu tveggja ára á menntasviði var að birtast," segir Oddný.

„Skólarnir eiga erfitt með að hagræða í innra starfinu, þriðja árið í röð. Því ákváðum við að bregðast nú við og draga til baka að nær öllu leyti fyrirhugaða skerðingu kennslumagns, og bæta í varðandi gæslu og forföll. Í raun erum við því að bæta í, miðað við fjárhagsáætlun fyrir síðasta ár."

Oddný segir þetta þó ekki hafa áhrif á vinnu starfshóps um sameiningar innan skólakerfis borgarinnar, því að ástandið undirstriki enn frekar nauðsyn breytinga. „Nú er lag að þora að fara út í þær kjarkmiklu breytingar sem rætt hefur verið um, til að hægt verði að standa vörð um skólastarfið sjálft."

Aðspurð segir Oddný að til greina komi að hækka útsvarið upp í leyfilegt hámark til að standa straum af kostnaðinum. „Að mínu mati er það réttlátasta leiðin til að verja skólastarfið að dreifa byrðum á sem sanngjarnastan hátt."

Guðrún Valdimarsdóttir, formaður SAMFOKS, samtaka foreldra grunnskólabarna í Reykjavík, segir í samtali við Fréttablaðið að þessi viðbót dugi ekki til.

„Þó að við fögnum þeim litlu skrefum sem tekin eru í að leiðrétta þessa ákvörðun, að ráðast á réttindi barna, þá er það svo að ef borgin hefði ekki varið kennsluna væri um gróft lögbrot að ræða."

Guðrún segist ekki sjá hvernig 200 milljónir komi til með að vinna upp þá 250 milljóna kennsluskerðingu sem fyrirhuguð hafi verið.

„Þau eru enn 50 milljónir í mínus fyrir utan það sem þarf til að verja gæsluna. Svo er enn, þrátt fyrir allt, verið að tala um 800 milljóna heildarniðurskurð til menntasviðs, sem er of mikið."

Guðrún bætir því við að skólamál skuli ekki notuð sem afsökun fyrir hækkun útsvars, enda eigi borgin fé í sjóðum. Borgin verði að forgangsraða í þágu barna og unglinga.thorgils@frettabladid.is