Dellusafn á Flateyri fyrir áráttusafnara

„Þetta er náttúrlega della," segir Jón Svanberg Hjartarson, safnari á Ísafirði, sem vill koma á fót „Dellusafni" á Flateyri.

Jón Svanberg óskar eftir því við bæjarráð Ísafjarðarbæjar að fá efri hæðina á gömlu bæjarskrifstofunum á Flateyri undir safnið. Ætlun hans er að þar verði, auk hans eigin lögreglumunasafns, söfn annarra sem safna gripum af öðru tagi. Úr verði eitt allsherjar dellusafn.

„Ég hef áður velt því fyrir mér að koma mínum gripum í safn sem fólk hefði aðgang að en ekkert varð af því. Nú spyrja menn hvað sé til ráða til að bæta úr atvinnu­ástandinu á minni stöðum og þá datt mér í hug að taka þessa hugmynd fram aftur," útskýrir Jón Svanberg sem vonast til að Dellusafnið verði lyftistöng fyrir Flateyri.

„Það vantar meiri fjölbreytni í afþreyingu fyrir ferðamenn og með þessu væri hægt að búa til allt að einu starfi yfir sumartímann. Það munar um það," bendir Jón Svanberg á.

Áhugann á lögreglumunum segir Jón Svanberg tengjast því að hann hafi verið lögreglumaður í sextán ár þar til hann hætti fyrir um tveimur árum. Áhersla hans sé á einkennishúfur. Hann eigi um 120 slíkar húfur víðs vegar að úr heiminum, lengst að frá Kína. Þá segist hann eiga um eitt þúsund einkennismerki, nokkra búninga og „valdbeitingarbúnað" frá ýmsum tímum, meðal annars frá óeirðunum á Austur­velli 1949.

„Hugmyndin þróaðist að lokum út í að koma upp safni um hinar ýmsu dellur, til dæmis fyrir þá sem safna bátalíkönum og ég hef heyrt um einn sem safnar sykurmolum," segir Jón Svanberg. Forsenda fyrir því að málið nái á næsta stig sé að tryggja húsnæði.

„Ég veit ekki um neina fyrirséða notkun á húsnæðinu og það gæti hentað," segir Jón Svanberg um aðra hæðina á gömlu bæjarstjórnarskrifstofunni. Bæjarráðið vísaði ósk hans „inn í aðra vinnslu hvað varðar málefni Flateyrar" eins og segir í afgreiðslunni. Hann kveðst ekki átta sig á merkingu þess. „Það er góð spurning. Ég hef fengið jákvæð viðbrögð en ekki svar af eða á og er að bíða eftir frekari upplýsingum frá bæjarráðinu." gar@frettabladid.is