Þrír í gæsluvarðhald

Þrír fyrrverandi starfsmenn Glitnis voru í kvöld úrskurðaðir í vikulangt gæsluvarðhald í tengslum við rannsókn embættis sérstaks saksóknara á viðskiptum bankans fyrir hrun. Er þeim haldið í varðhaldi á grundvelli rannsóknarhagsmuna, samkvæmt upplýsingum frá Ólafi Þór Haukssyni, sérstökum saksóknara.

Um er að ræða Lárus Welding, fyrrum forstjóra Glitnis, Jóhannes Baldursson, fyrrum framkvæmdastjóra markaðsviðskipta, og Inga Rafnar Júlíusson, fyrrum starfsmann bankans. Þeir voru allir leiddir fyrir dómara fyrr í kvöld, hver á eftir öðrum.

Beiðni um gæsluvarðhald yfir Elmari Svavarssyni miðlara var hafnað af dómara, eins og áður hefur verið greint frá á Vísi.

Í tilkynningu frá embætti sérstaks saksóknara frá því í dag kemur fram að rannsókn málsins tengdist einkum fjórum þáttum. Þeir eru:

1. Kaup eigin viðskipta Glitnis á hlutabréfum útgefnum af bankanum á verðbréfamarkaðinum. Einnig kaup bankans og ráðstöfun á hlutabréfum útgefnum af FL Group.

2. Lánveitingar til ýmissa félaga vegna kaupa á hlutabréfum útgefnum af bankanum í lok árs 2007 og á árinu 2008. Upphaflegur höfuðstóll nefndra lánveitinga er talinn nema samtals tæpum 37 milljörðum króna.

3. Viðskipti með framvirka samninga í hlutabréfum útgefnum af bankanum.

4. Sölutrygging Glitnis á 15 milljarða hlutafjárútboði FL Group áramótin 2007 og 2008.

Til rannsóknar er grunur um meint brot á auðgunarbrotakafla hegningarlaga í tengslum við ráðstafanir á fjármunum Glitnis, brot á lögum um verðbréfaviðskipti, lögum um fjármálafyrirtæki, lögum um ársreikninga og lögum um bókhald.

Upphaf rannsókna á málunum má m.a. rekja til kæra frá Fjármálaeftirlitinu og síðan rannsókna slitastjórnar Glitnis.

Ólafur Þór Hauksson hefur ekki upplýst um hvort gæsluvarðhaldsúrskurðurnir hafi verið kærðir til Hæstaréttar. Þá hafa lögmenn þeirra sem í hlut eiga ekki viljað veita upplýsingar um málin.