Breskt eðalgrín til landsins

Breska gamanmyndin The Inbetweeners verður frumsýnd um helgina, en hún hefur slegið rækilega í gegn heimafyrir og fengið lofsamlega dóma. Myndin er byggð á samnefndum þáttum sem sýndir voru á áskriftarstöðinni E4, en þeir segja frá lífi Will og félaga hans í bresku úthverfi. Þættirnir eru margverðlaunaðir og voru tvívegis tilnefndir til Bafta-verðlauna sem bestu gamanþættirnir.

Þættirnir eru hugmyndaverk Damon Beesley og Iain Morris, en Beesley hefur meðal annars unnið með gríntvíeykinu The Flight of the Conchords. Morris er hins vegar þekktur útvarpsmaður. Í stuttu máli segir myndin frá því þegar áðurnefndur Will og þrír félagar hans halda í útskriftarferð til Malíu á Krít. Og eins og gefur að skilja fer ýmislegt úrskeiðis.

Tónlist lék stórt hlutverk í þáttunum og engin breyting er á því í myndinni, en þar má meðal annars heyra ný lög eftir Mike Skinner, fyrrum forsprakka The Streets.

Kvikmyndin In Time verður einnig frumsýnd um helgina, en hún skartar Justin Timberlake og Amöndu Seyfried í aðalhlutverkum. Timberlake þarf vart að kynna en Seyfried er hvað þekktust fyrir leik sinn í Mamma Mia. Myndin er hasarmynd sem gerist í framtíðinni þegar fólk hættir að eldast 25 ára. Og tími hefur komið í stað peninga sem gjaldmiðill.- fgg