Jörundur Áki tekur við starfi Guðjóns Þórðarsonar

Jörundur Áki Sveinsson, fyrrum aðstoðarþjálfari Heimis Guðjónssonar hjá FH, hefur verið ráðinn þjálfari BÍ/Bolungarvíkur en Jörundur Áki gerði þriggja ára samning við Djúpmenn. Þetta kemur fram í fréttatilkynningu frá frá BÍ/Bolungarvík.

Jörundur Áki hefur störf um næstu mánaðarmót en hann tekur við starfi Guðjóns Þórðarsonar sem var rekinn frá félaginu á dögunum. BÍ/Bolungarvík endaði í sjötta sæti í 1. deildinni í sumar og komst alla leið í undanúrslit bikarsins.

Jörundur Áki á að baki langan þjálfaraferil en hefur náð lengst í kvennaboltanum þar sem að hann gerði Breiðablik tvisvar að Íslandsmeisturum og stjórnaði einnig íslenska kvennalandsliðinu.

Jörundur Áki var síðast aðalþjálfari í meistaraflokki karla þegar hann stýrði Stjörnunni 2005 til 2006. Fyrra árið fór hann með Stjörnuliðið upp úr 2. deildinni og seinna sumarið endaði liðið í 5. sæti í 1. deildinni.

Tveir bestu leikmenn Íslandsmótsins í ár (að mati Fréttablaðsins), Daníel Laxdal og Hannes Þór Halldórsson, spiluðu báðir undir hans stjórn þetta sumar.