Tromsö eflist sem heimsborg norðursins

Þrátt fyrir að bærinn Tromsö í Norður-Noregi sé talsvert norðar en Kolbeinsey fjölgar fólki þar tvöfalt hraðar en í Reykjavík og gæti svo farið að þessi höfuðstaður Norður-Noregs verði stærri en höfuðborg Íslands á næstu áratugum.

Nú þegar miklar olíulindir hafa fundist í Barentshafi sjá menn fram á að helstu bæir Norður-Noregs eigi eftir að soga til sín fólk á næstu árum. Trömsö, sem liggur langt fyrir norðan heimsskautsbaug, er þegar orðinn gríðarlega öflugur bær og hann á enn eftir að styrkjast.

Þarna búa nú um sjötíu þúsund manns, og hefur fjölgað um fimmtán prósent frá aldamótum en á sama tíma fjölgaði Reykvíkingum um átta prósent. Nýreistar glæsibyggingar gefa þá hugmynd að þarna flæði peningarnir. Rétt eins og Hrísey á Eyjafirði er Tromsö eyja á firði, eða raunar á sundi. Þarna eru samgöngurnar þó heldur betri og tvær risabrýr tengja Tromsö við fastalandið og aðra eyju.

Einnig er búið að grafa bílagöng undir sundið og raunar eru jarðgöng með fjórum gangamunnum undir bænum, meira að segja með tveimur hringtorgum. Göngin eru bæði til að stytta leiðir og létta á bílaumferð innanbæjar, nokkuð sem Reykvíkinga hefur lengið dreymt um fyrir sína miðborg en aldrei tekist að koma í framkvæmd.

Tromsö byggðist upp sem fiskveiði-, verslunar- og samgöngumiðstöð, og heldur sterkri stöðu á öllum þeim sviðum, en á síðustu fjörutíu árum hafa þættir eins uppbygging flugvallar, háskólakennslu og opinberrar þjónustu, eins og sjúkrahúss, stuðlað að enn frekari vexti. Rannsóknarmiðstöðvar, eins og Pólarstofnun Noregs, og menningarstofnanir, eins og Hálogalandsleikhúsið, hjálpa til að gera þetta að heimsborg í norðrinu.

Ef Tromsö væri í hánorður af Íslandi væri hún á móts við Scoresbysund á Grænlandi, en lega hennar svo norðarlega hefur ekki komið í veg fyrir að þar eflist byggð, nokkuð sem Íslendingar gætu haft í huga.