Vekur athygli tískuheimsins

Ari Helgason er stofnandi fyrirtækisins Fabricly sem er ætlað að aðstoða fatahönnuði við að koma fatalínu sinni markað. Ari er búsettur í New York og stofnaði Fabricly í byrjun síðasta árs. Móttökurnar hafa að hans sögn verið mjög góðar bæði meðal hönnuða og kaupenda enda fer fyrirtækið nýjar leiðir í framleiðslu og sölu á tískufatnaði.

Tímaritið Women's Wear Daily hefur meðal annars fjallað um starfsemi Fabricly en Anna Wintour, ritstjóri bandaríska Vogue, er sögð lesa það blað reglulega til að fylgjast með nýjungum

innan tískuheimsins.

„Fabricly hjálpar fatahönnuðum við að koma línum sínum á markað. Þeir senda okkur hugmyndir að línum og við borgum fyrir prótótýpur, framleiðslu, myndatöku og fleira. Fötin eru síðan seld á vefsíðunni okkar og seinna munum við einnig selja í verslanir." Samstarfið er því svipað og milli plötufyrirtækja og tónlistarfólks.

Hugmyndina að Fabricly segir Ari hafa kviknað í kjölfar fyrirtækis sem hann hafði stofnað ásamt bróður sínum, fatahönnuðinum Ingvari Helgasyni. Fyrirtækið selur hugbúnað sem hjálpar litlum tískufyrirtækjum með sölu og flýtir fyrir framleiðslu. Í gegnum það kynntist Ari fjölda hönnuða sem áttu í miklum vandræðum bæði með framleiðslu og að koma vörum sínum á markað.

„Við sáum tækifæri í því að fá kaupendur til að aðstoða okkur við valið á flíkum og koma þannig með vöru sem fólk vill kaupa. Við horfðum líka á hvernig fyrirtæki eins og Zara geta framleitt föt á fáeinum vikum og komist hjá því að framleiða of mikið af vöru, sem selst ekki, með því að framleiða í minni skömmtum." Vefsíða Fabricly er fabricly.com. - sm