Tveir bankar líklegir til að bítast um Byr

Ekki er útilokað að Íslandsbanki og Landsbankinn (NBI) banki á dyr kröfuhafa Byrs í næsta mánuði og bjóði upp á samrunaviðræður hvor í sínu lagi. Það gæti gerst sama dag og fjárhagslegri endurskipulagningu bankans lýkur eftir tvær til fjórar vikur.

Fjármálaeftirlitið, FME, greip inn í reksturs Byr seint í apríl í fyrra, skipaði yfir hann slitastjórn, skipti bankanum í tvennt og lagði ríkið nýjum banka til níu hundruð milljóna króna eiginfjárframlag auk fimm milljarða króna víkjandi láns í formi lánalínu. Úr rústum sparisjóðsins reis viðskiptabankinn Byr sem ótengdur er sparisjóðanetinu. Kröfuhafar Byrs samþykktu í fyrrahaust að taka yfir 94,8 prósenta hlut í Byr á móti ríkinu. Sami háttur er hafður á eignarhaldinu og í gömlu viðskiptabönkunum; kröfuhafar stofna eignarhaldsfélag sem fer formlega með hlut þeirra í bankanum.

Stjórn Glitnis óskaði eftir samrunaviðræðum í september 2008, sama dag og hlutafjárvæðing sparisjóðsins lá fyrir. Ekkert varð úr viðræðum þar sem FME greip í taumana og tók Glitni yfir nokkrum dögum síðar. Áhugi á samruna mun enn vera fyrir hendi innan Íslandsbanka og hafa stefnumótunarfundir verið haldnir þar sem teiknað er upp hvað taki við eftir yfirtökuna. Sambærilegt skipurit mun vera á borðum innan Landsbankans.

Bankarnir hafa báðir lýst yfir áhuga á samruna við Byr. Með því móti geta þeir haldið áfram nauðsynlegri hagræðingu í rekstri, sameinað útibú og bakvinnslur. Við þetta mun fjármálakerfið, sem Alþjóðagjaldeyrissjóðurinn hefur sagt enn of stórt, vera skorið niður.

„Við höfum lýst opinberlega yfir áhuga á Byr og finnst að ríkið sem stærsti eigandi á fjármálamarkaði eigi að ganga undir það góða fordæmi að menn telji bankakerfið of stórt og leiti leiða til að sameina Landsbankann og Byr," segir Kristján en tekur fyrir að vinna í þá átt sé langt komin innan Landsbankans. „Við teljum að þetta geti skapað Landsbankanum tækifæri til hagræðingar, svo sem í útibúaneti og bakvinnslu. En við höfum ekki lagt fram nein tilboð," segir hann og vísar til þess að Steinþór Pálsson sagði í samtali við Viðskiptablaðið í fyrrahaust að góð tækifæri væru til hagræðingar. Þá voru báðir bankar að mestu í eigu ríkisins. Kröfuhafar Byrs eru í dag hins vegar nokkurn veginn þeir sömu og eiga 95 prósenta hlut í Íslandsbanka og gæti því meiri samlegðaráhrifa gætt þar. Íslandsbanki vildi ekki tjá sig um málið þegar eftir því var leitað.