Spáir 5,4% verðbólgu í ágúst

Greining Íslandsbanka spáir því að vísitala neysluverðs (VNV) hækki um 0,6% í ágúst frá fyrri mánuði. Gangi spáin eftir eykst 12 mánaða verðbólga úr 5,0% í 5,4% í þessum mánuði.

Í Morgunkorni greiningarinnar segir að í mælingu ágústmánaðar munu vegast á hækkunaráhrif vegna sumarútsöluloka, verðhækkunar á íbúðamarkaði og lækkunaráhrif vegna eldsneytisverðs.

„Í ágúst lýkur sumarútsölum og gerum við ráð fyrir nærri 6% hækkun á fata- og skóverði í mánuðinum (+ 0,3% áhrif í VNV). Jafnframt virðist lítið lát vera á verðhækkun á íbúðamarkaði, og gerum við ráð fyrir að áhrif hennar í ágúst verði til 0,1% hækkunar á VNV. Einnig teljum við að áhrif af kjarasamningum sem gengu í gildi í júníbyrjun séu enn að koma fram og munu þá m.a. hafa áhrif á verðlag á mat- og drykkjarvörur í mánuðinum (+0,1% áhrif í VNV) sem og á hótelum og veitingastöðum svo eitthvað sé nefnt,“ segir í Morgunkorninu.

„Á móti þessum hækkunaráhrifum kemur þróun olíuverðs á heimsmarkaði sem hefur lækkað upp á síðkastið vegna ólgunnar á erlendum mörkuðum. Hefur sú lækkun komið fram að hluta til í eldsneytisverði hér á landi og teljum við að lækkun þess vegi til 0,1% lækkunar á VNV.“

Þá kemur fram að verðbólguhorfur fyrir yfirstandandi ár eru nú mun lakari en útlit var fyrir í upphafi árs.

„Við gerum ráð fyrir að VNV hækki talsvert fram eftir vetri. Þannig spáum við samtals 1,3% hækkun vísitölunnar í september og október, þegar útsöluáhrif ganga til baka og áhrif kjarasamninga koma enn frekar fram,“ segir í Morgunkorninu.

„Verðbólga mun þá mælast 6% í október, gangi spá okkar eftir, og verða yfir 6% fram yfir áramót. Í kjölfarið gerum við ráð fyrir að aftur dragi úr verðbólgunni og að hún mælist 4% yfir árið 2012. Ekki er hins vegar útlit fyrir að verðbólga verði við 2,5% markmið Seðlabankans fyrr en á árinu 2013, nema krónan styrkist talsvert og/eða orku- og hrávöruverð lækki umtalsvert svo eitthvað sé nefnt af þeim þáttum sem gætu dregið úr verðbólgunni á næstunni.“