Umfjöllun og viðtöl: Ísland - Tékkland 31-24

Ísland vann Tékkland 31-24 í vináttulandsleik í kvöld sem fram fór í Vodafonehöllinni. Liðin mættast aftur á morgun á sama staða en þessir leikir eru hluti af loka undirbúning landsliðsins fyrir HM í Brasilíu sem hefst í næstu viku.

Þær tékknesku byrjuðu leikinn örlítið betur og voru með ákveðið frumkvæði fyrstu mínúturnar. Þegar leið á fyrri hálfleikinn komust þær íslensku vel í takt við leikinn og gerðu á kafla fjögur mörk gegn engu og komust í 11-6. Gestirnir komu aftur til baka og minnkuðu muninn fyrir hálfleik, en staðan var 15-14 í hálfleik.

Íslendingar voru mun betri aðilinn í síðari hálfleiknum og náðu fljótlega ágætu forskoti. Íslensku stelpurnar keyrðu upp hraðan og gestirnir réðu illa við það. Heimastúlkur unnu að lokum sjö marka sigur 31-24 og litu ágætlega út í kvöld.





Stella: Unnum þennan leik með góðum varnarleik

„Þetta var mjög góður sigur og virkilega gott fyrir sjálfstraustið í liðinu," sagði Stella Sigurðardóttir, leikmaður íslenska landsliðsins, eftir sigurinn í kvöld.

„Það var mikilvægt fyrir okkur að sigra hér í kvöld. Við verðum samt að mæta jafn vel stemmdar til leiks á morgun".

„Mér fannst við spila vel nánast allan leikinn og sýndum frábæran varnarleik. Góð vörn og hraðaupphlaup skilaði sigrinum í kvöld".

Hægt er að sjá viðtalið við Stellu hér að ofan.

Ágúst: Ég er ánægður með margt eftir leikinn í kvöld

„Þegar ég horfi á leikinn í heild sinni þá er ég virkilega ánægður með sjö marka sigur," sagði Ágúst Jóhannsson, þjálfari íslenska landsliðsins.

„Varnarleikurinn var lengstum mjög góður og það var ég ánægður með. Við keyrðum síðan bara yfir þær hérna á lokamínútunum. Það vantaði smá drápseðli í stelpurnar í fyrri hálfleiknum svo við gætum slitið okkur almennilega frá þeim tékknesku. Það er margt sem ég er mjög sáttur með eftir leikinn í kvöld".

Flestir leikmenn komu við sögu í leiknum í gær og Ágúst dreifði álaginu vel.

„Það er nokkuð ljóst að þegar út í Heimsmeistarakeppnina er komið þá þurfum við að spila marga leiki á fáum dögum, því er nauðsynlegt að dreifa álaginu vel. Liðið er nokkuð jafnt að getu og við verðum að fara í gegnum þetta sem lið".

Hægt er að sjá viðtalið við Ágúst með því að ýta hér.