Óska eftir rökstuðningi fyrir ráðningu Páls

Umsækjendur um stöðu forstjóra Bankasýslu ríkisins hafa óskað eftir rökstuðningi fyrir ráðningu Páls Magnússonar í stöðu forstjóra stofnunarinnar. Páll Magnússon, fyrrverandi aðstoðarmaður iðnaðarráðherra, var ráðinn í starfið en hann er með BA próf í guðfræði og meistarapróf í opinberri stjórnsýslu. Aðrir umsækjendur höfðu menntun sem var sérsniðnari að störfum í bankakerfinu.

Á opnum fundi efnahags- og viðskiptanefndar í morgun var Steingrímur J. Sigfússon fjármálaráðherra spurður út í viðbrögð hans við ráðningunni. Stofnunin heyrir undir hann. Steingrímur sagði að ákveðið hefði verið að skrifa Bankasýslunni á grundvelli almennrar eftirlitsskyldu ráðuneytisins.

„Við væntum svara frá Bankasýslunni mjög fljótlega," sagði Steingrímur. Einkum væri þess vænst að útskýrt væri og rökstutt hvernig staðið hafi verið að hæfnisprófinu. „Við mátum það sem svo að það væri eðlilegt fyrsta skref," segir Steingrímur. Beðið væri eftir svörum frá Bankasýslunni áður en lengra er haldið.

Smelltu hér til að horfa á útsendingu af fundi efnahags- og viðskiptanefndar.