Þjóðverjar réðu ekki við Gasol-bræðurna í spænska landsliðinu

Spánn vann níu stiga sigur á Þýskalandi, 77-68, í fyrsta leik liðanna í milliriðli á EM í körfubolta í dag. Spánverjar tryggðu sér sigurinn með því að vinna lokaleikhlutann 21-13 en spænska liðið var þremur stigum yfir í hálfleik, 36-33.

Gasol-bræðurnir, Pau og Marc, voru í aðalhlutverki hjá Spánverjum. Marc Gasol var með 24 stig, 5 fráköst og 9 fiskaðar villur en Pau Gasol bætti við 19 stigum, 7 fráköstum og 6 fiskuðum villum. Þeir kappar nýttu saman 18 af 21 víti sínu í leiknum.

Næstir þeim í stigaskori hjá Evrópumeisturunum voru Juan Carlos Navarro með 14 stig og 5 stoðsendingar og Fernando San Emeterio sem skoraði 12 stig.

Dirk Nowitzki skoraði 19 stig fyrir þýska liðið og Chris Kaman bætti við 15 stigum og 12 fráköstum.