Landsbankamenn líka með milljónir í tekjur

Tekjur nefndamanna í skilanefnd og slitastjórn Landsbankans námu á síðasta ári alls 386 milljónum króna, samkvæmt ársreikningi gamla Landsbankans sem birtur var í byrjun mars.

Nefndarmenn voru fimm, samkvæmt upplýsingum frá Páli Benediktssyni, upplýsingafulltrúa skilanefndarinnar. Þetta jafngildir um 77 milljónum króna í árstekjur á hvern nefndarmann. Páll bendir hins vegar á að um verktakagreiðslur sé að ræða. Því sé réttara að tala um tekjur í þessu samhengi en ekki laun.

Eins og greint var frá í gær kemur fram í ársreikningi Glitnis að fimm nefndarmenn í skilanefnd og slitastjórn Glitnis skiptu á milli sín 348 milljónum í fyrra. Þar er einnig um að ræða verktakagreiðslur. Árni Tómasson, formaður skilanefndarinnar, fullyrðir hins vegar í samtali við Vísi að nefndarmenn hafi lengst af á árinu verið sjö. Árni bendir á að frá tölunni reiknist útlagður kostnaður nefndarmanna, svo sem símakostnaður og fleira.