Jens Línus Gauti rekur stefnumótasíðu fyrir einhleypa kattaeigendur

Einhleypur íslenskur karlmaður sem býr í Grikklandi hefur sett upp stefnumótasíðu fyrir einhleypa kattaeigendur. Hann hafði verið að þróa hugbúnað fyrir samskipti þegar flækingsköttur gerði sig heimankominn hjá honum. Þá fékk hann hugmyndina að rekstri síðunnar.

Hann byrjaði með netfangið ecat.eu í nóvember. „Svo fór þetta í loftið og fékk þessar góðu viðtökur frá konum í Bandaríkjunum. Ég fékk þess vegna z.com endingu sem virkar þarna vestra," segir Jens Línus Gauti Kristjánsson sem heldur úti síðunni.

Rekstur vefsíðunnar er aðalstarf Jens. „Ég geri ráð fyrir að hafa í mig og á af þessu og mat handa köttunum næstu 20 árum eða svo," segir Jens. Jens er um þessar mundir að leita að fjárfestum og styrktaraðilum til að halda rekstri síðunnar áfram og markaðssetja vefsíðuna. „Mig vantar 350 þúsund dollara," segir Jens, en sú upphæð samsvarar um 40 milljónum íslenskra króna. Jens telur að ef fjármagn fæst til að markaðssetja vefinn muni hann taka við um 20 þúsund heimsóknum á dag að meðaltali eftir 2 ár, með 18-20 flettingum við hverja heimsókn.

En þrátt fyrir að Jens sé bjartsýnn á rekstur stefnumótasíðunnar er hann ekki eins viss um að hún muni skila honum kvenmanni á heimilið. „Húsið mitt er þannig að það er eiginlega ekki lengur íbúðarhæft," segir Jens. Hann segir að húsið hans sé staðsett í Rhodos. Gluggakarmar séu fúnir og það vanti rúður í húsið. „Þetta hús er átta hundruð ára gamalt held ég. Þaðhefur verið gert upp oft en illa," segir Jens. Á Íslandi myndi húsið sennilegast teljast vera fokhelt. „Þannig að ég held að það muni enginn kvenmaður vilja flytja hingað," segir Jens. Hann gerir því ráð fyrir að búa einn með sex heimilsköttum næstu árin. Að auki hefur henn tíu villiketti á fóðrum.