Verjum skólastarfið

Nokkur umræða hefur verið um sparnaðaraðgerðir í leik- og grunnskólum. Því er haldið fram að sameiningar í yfirstjórn leikskóla spari ekki neitt, en það er rangt. Tillögur okkar um sameiningu 30 leikskóla í 14 eiga sér tveggja ára aðdraganda, hagræðingin mun nema 105 milljónum á ári, eða að meðaltali sjö og hálfri milljón á hverja sameiningu. Þetta er um 4,2% hagræðing í rekstrarkostnaði hvers skóla og samsvarar tæplega 100 nýjum leikskólaplássum.

Þær leikskólasameiningar sem borgin fór í á síðustu tveimur árum hafa leitt til sparnaðar. Starfið í þeim skólum er frábært, börnunum líður vel og það er mikilvægast.

Efnahagsumhverfið á þriðja ári í kreppu hefur síst batnað. Tekjur borgarsjóðs hafa dregist saman um 20% að núvirði. Á sama tíma hafa útgjöld til velferðarmála aukist og leikskólabörnum fjölgað mjög mikið. Orkuveitan hefur breyst úr óskabarni í þunga byrði og ekki má borgin taka lán til rekstrar.

Við verðum einfaldlega að spara og þar eigum við ekki marga kosti: að fækka í yfirstjórn, fjölga börnum á hvern starfsmann, lækka laun almennra starfsmanna í leikskólum eða geta ekki boðið öllum tveggja ára börnum í borginni leikskólapláss. Enginn þessara kosta er góður.

Við ætlum að verja gæði leikskóla, grunnskóla og frístundaheimila. Þess vegna leitum við leiða til að sameina, hagræða, fækka mötuneytum, spara í stjórnun og yfirbyggingu alls staðar. Það veldur áhyggjum en er þrátt fyrir allt langbesta leiðin til að lækka kostnað án þess að það bitni á börnunum sjálfum.

Við höfum verið gagnrýnd fyrir skort á samráði og hraða breytinganna. Ég viðurkenni fúslega að við gátum ekki talað við foreldra 20.000 barna í Reykjavík en á annað þúsund manns hafa komið sínum sjónarmiðum á framfæri undanfarna mánuði. Og auðvitað hefði þetta ferli átt að hefjast af krafti strax árið 2008. Tveimur dýrmætum árum var eytt í annað og nú má einfaldlega ekki bíða lengur. Breytingarnar eru skynsamlegar, vandlega ígrundaðar og vel undirbúnar af fjölda framúrskarandi fagfólks. Ég treysti starfsfólki í skólum og frístund fyllilega til að hrinda þeim í framkvæmd.

Okkar mikilvægasta verkefni í kreppunni að tryggja að börnum líði vel og að þau verði sem minnst vör við þær þrengingar sem við erum að ganga í gegnum. Það munum við gera í sameiningu.