Spádómskýrin Glæta óviss um Icesave

Spádómskýrin Glæta hefur ekki gert upp hug sinn varðandi Icesave samninginn, segir eigandi hennar. Glæta, frá bænum Kotlaugum í Hrunamannahreppi reyndist margsinnis sannspá þegar hún var að spá fyrir um leiki íslenska handknattleiksliðsins.

„Nei, ég hef ekkert orðið var við það,“ segir Sigurjón Sigurðsson, eigandi Glætu, þegar Vísir sló á þráðinn til hans til að spyrja hvort kýrin hefði lýst hug sínum. Hann segist ekki muna hversu marga leiki Glæta spáði rétt fyrir um þegar HM fór fram. „Það man ég nú bara ekki. Það var annar sem náði þessum vísdómi upp úr henni,“ segir Sigurjón.