Jón Arnór með átta stig í tapleik

Jón Arnór Stefánsson skoraði átta stig fyrir CB Granada sem tapaði í dag fyrir Caja Laboral, 78-63, í spænsku úrvalsdeildinni í körfubolta.

Jón Arnór setti niður tvær af fimm þriggja stiga tilraunum sínum í leiknum en klikkaði á öllum fjórum skotum sínum innan teigsins. Hann setti niður tvö vítaköst þar að auki og tók eitt frákast.

CB Granada hefur ekki enn unnið leik á nýju ári og er í neðsta sæti deildarinnar með þrjá sigra í 21 leik.

Barcelona er í efsta sæti deildarinnar með átján sigra en Real Madrid í því öðru með sautján. Næstu lið, þeirra á meðal Caja Laboral, eru talsvert á eftir með þrettán sigra.