Norskur útvarpsmaður: Undanúrslitin skipta öllu

Einn þeirra fjölmörgu norsku fjölmiðlamanna sem eru staddir á Evrópumeistaramótinu í Austurríki er Eirik Torbjörnsen. Hann lýsir leikjum Noregs á P4-útvarpsstöðinni sem sendir út um allan Noreg.

Vísir hitti á hann skömmu fyrir leik Íslands og Rússlands á miðvikudaginn en þá var hann að undirbúa útsendingu fyrir leik Noregs gegn Danmörku síðar um kvöldið. Noregur tapaði þeim leik með minnsta mun, 24-23, eftir dramatískar lokamínútur.

Ísland mætir Noregi á morgun og getur með sigri tryggt sér sæti í undanúrslitunum. Möguleikar Noregs eru þó ekki fyrir bí. Sigri liðið Ísland með fjórum mörkum eru þeir komnir í undanúrslit svo lengi sem Danmörk tapar fyrir Króatíu.

„Í svona móti er það eina sem skiptir máli er að komast í undanúrslitin. Því verður leikurinn gegn Íslandi afar mikilvægur og mjög erfiður," sagði Torbjörnsen.

„Miðað við frammistöðu Íslands á mótinu reikna ég með mjög erfiðum leik. Noregur á mjög góðan markvörð - Steinar Ege - en ég tel að allir aðrir leikmenn þurfi að bæta sinn leik til að eiga möguleika gegn Íslandi."

Hann fylgdist með leik Íslands gegn Króatíu á þriðjudaginn og hreifst af frammistöðu íslenska liðsins.

„Sérstaklega fannst mér þeir Snorri Steinn Guðjónsson og Ólafur Stefánsson góðir. Svo tók ég líka eftir því að Íslendingar eiga mjög góðan markvörð, Björgvin Gústavsson."

Norðmenn komu með tvö stig í milliriðilinn og byrjuðu á því að vinna Austurríki.

„Ég held að Norðmenn hafa verið heppnir í riðlakeppninni. Þeir voru ekki að spila vel í riðlinum og voru heppnir að hafa þó fengið tvö stig. Þeir fóru oft illa að ráði sínu á lokamínútum leikjanna," sagði Torbjörnsen.

Það kom sannarlega í ljós gegn Danmörku þar sem liðið var með forystuna allan leikinn þar til á lokasekúndum leiksins. Torbjörnsen segir mikinn áhuga í Noregi fyrir handboltalandsliðinu.

„Sjónvarpsstöðin TV2 sendir út leikina á besta tíma og um milljón manns horfa á hvern leik - um fjórðungur þjóðarinnar. Leikjunum er líka lýst í útvarpi og öll stóru dagblöðin fjalla ítarlega um mótið á hverjum degi. Auðvitað á þó handboltinn þó ekkert í Vetrarólympíuleikana - enn sem komið er allavega."