Lögregluþjónn fer í fangelsi

Grískur lögregluþjónn var í gær sakfelldur fyrir að hafa myrt fimmtán ára ungling með skotvopni í miðborg Aþenu síðla árs 2008. Hann var dæmdur í ævilangt fangelsi.

Meirihluti dómstólsins komst að því að lögregluþjónninn, Epaminondas Korkenas, hefði vísvitandi skotið á piltinn, sem hét Alexander Grigoropoulos. Annar lögregluþjónn var dæmdur samsekur í málinu og hlaut tíu ára fangelsisdóm.

Lát piltsins varð til þess að heiftúðugar óeirðir brutust út víða um Grikkland og stóðu þær linnulítið í tvær vikur. Ungmenni fóru í hópum um borgir landsins nánast á hverju kvöldi, kveiktu í bifreiðum og húsum, brutu gluggarúður, brutust inn í verslanir og lentu í átökum við lögreglu. Hópar anarkista hófu einnig árásir á lögreglustöðvar og opinberar byggingar.

Í desember á síðasta ári, þegar rétt ár var liðið frá láti piltsins, brutust aftur út óeirðir, en þær urðu ekki jafn viðamiklar. Korkenas viðurkenndi að hafa hleypt af byssunni, en sagði það einungis hafa verið gert til viðvörunar eftir að lögreglumönnum lenti saman við hóp unglinga. Þetta gerðist í hverfinu Exarchia, þar sem næturlíf er fjörugt og hópar stjórnleysingja safnast saman.

Korkenas hefur hins vegar jafnan haldið því fram að hann hafi ekki skotið beint á Grigoropolous, heldur hafi pilturinn orðið fyrir byssukúlunni eftir að hún endurkastaðist af vegg eða götu.

Sjö manna dómstóll, skipaður þremur dómurum og fjórum kviðdómendum, klofnaði í afstöðu sinni. Fjórir af sjö stóðu að úrskurðinum, en tveir dómaranna og einn kviðdómendanna vildu sakfella Korkenas fyrir veigaminna brot, nefnilega manndráp frekar en morð, sem hefði jafnframt haft í för með sér vægari refsingu.

Réttarhöldin voru haldin í borginni Amfissa, sem er 200 kílómetra vestur af Aþenu. Þetta var gert af öryggisástæðum, því óttast var að réttarhöldin yrðu kveikja frekari óeirða.

gudsteinn@frettabladid.is