„Hann segir ekki neitt af viti, alveg eins og kelling"

Oddný G. Harðardóttir, þingmaður og formaður fjárlaganefndar, segir í pistli á heimasíðu Víkurfrétta vera hissa og reið yfir ummælum Ásmundar Friðrikssonar, bæjarstjóra í Garði, sem hann hafði um Steingrím J. Sigfússon fjármálaráðherra á opnum fundi í Stapa síðastliðinn fimmtudag.

„Hann kemur hingað og segir ekki neitt af viti, alveg eins og kelling," sagði Ásmundur bæjarstjóri á fyrrnefndum fundi. Oddný segir að þessi ummæli vera niðrandi og vekji upp sterkar tilfinningar „og gefa ríkt tilefni til að konur láti í sér heyra."

Hún segir orðin koma aðeins nokkrum dögum eftir að þúsundir kvenna um allt land hafi minnt á nauðsyn jafnréttis kynjanna fyrir velferð, atvinnuuppbyggingu, hagvöxt, frið og gott samfélag.

„Þarf virkilega að minna Ásmund á það stóra hlutverk sem karlar léku við að koma okkur í þau vandræði sem við glímum nú við og var meðal annars tilefni fundarins í Stapa? Þar hefði kannski farið betur ef fleiri hefðu hagað sér eins og kerlingar.

Mér finnst að Ásmundur eigi að biðja konur opinberlega afsökunar og að sjálfstæðismenn í Garði eigi að sjá til þess að bæjarstjórinn sem starfar á þeirra ábyrgð láti ekki fordóma gagnvart konum byrgja sér sýn.

Talsmenn Suðurnesjamanna verða að sýna ábyrgð í orðum og athöfnum, ekki síst nú þegar kallað er eftir breiðu samstarfi við lausn þess mikla vanda sem við íbúar Suðurnesja búum við."