Segir viðskipti Baugsfélags „fjárhættuspil“

Skiptastjóri þrotabús Sólarinnar skín, sem var dótturfélag Baugs, segir viðskipti félagsins við Glitni banka um hlutabréf í Marks & Spencer ekkert annað en fjárhættuspil. Þrotabúið er eignalaust en heildarkröfur í búið nema fimmtán milljörðum króna.

Sólin skín ehf. var í eigu Baugs Group, Fons, Glitnis og breska kaupsýslumannsins Kevin Stanford. Félagið var stofnað á haustmánuðum 2007 utan um framvirkan samning þar sem tekin var staða í bresku verslanakeðjunni Marks & Spencer. Sólin skín var úrskurðuð gjaldþrota í lok síðasta árs. Glitnir banki er að gera kröfu upp á 11 milljarða króna og Baugur Group upp á rúma 3 milljarða króna.

Páll Kristjánsson, héraðsdómslögmaður og skiptastjóri þrotabús Sólarinnar skín, segir að viðskipti félagsins við Glitni með framvirka samninga verið þannig að menn hafi veðjað hvor gegn öðrum. Krafa Glitnis í þrotabúið sé í raun veðmál sem hafi unnist. Hann segir að þessi viðskipti hafi í raun og veru ekki verið neitt annað en fjárhættuspil.

Páll segir að viðskipti Sólarinnar skín við Glitni geti varla flokkast undir eðlilega viðskiptahætti. Kröfur í þrotabúið nema núna 15 milljörðum króna en félagið var starfrækt í 381 dag. Það þýðir í reynd tap upp á 1,6 milljónir króna á klukkustund, alla daga ársins. Páll segir morgunljóst að hinn almenni viðskiptamaður Glitnis hefði ekki fengið að gera eins samning við bankann og Sólin skín fékk að gera, en Glitnir var að stærstum hluta í eigu þeirra sömu og áttu Sólina skín.

Stefán Hilmarsson, sem var stjórnarformaður Sólarinnar skín, baðst undan viðtali en sagði að viðskipti félagsins við Glitni með framvirka samninga hafi verið í samræmi við reglur bankans. Hann hafnaði ásökunum um fjárhættuspil og sagði að viðskiptin hafi ekki falið í sér áhættu umfram almenna markaðsáhættu með fjármálagerninga.