Grímur Atlason flytur á mölina

„Mig langar bara að njóta lífsins með mínu fólki," segir Grímur Atlason, sveitarstjóri í Dalabyggð. Hann hefur ákveðið að flytja til Reykjavíkur, þar sem fjölskylda hans býr, þegar ráðningartíma hans lýkur eftir sveitarstjórnarkosningar í maí. Grímur var ráðinn bæjarstjóri í Bolungarvík árið 2006 en var sagt upp störfum þegar meirihlutaskipti urðu í bænum. Hann var ráðinn sveitarstjóri Í Dalabyggð um mitt ár 2008.

„Við höfum búið á tveimur stöðum síðan þetta leystist upp í Bolungarvík. Nú ætla ég bara að vera með fjölskyldunni í Reykjavík," segir Grímur.

Grímur er ánægður með tíma sinn í Dalabyggð og kveður sáttur í vor.

„Ég held líka að fólk hérna sé sátt við mig, það er búið að koma málum í góðan farveg."

Sveitarstjórinn segist ekki vera búinn að ákveða hvað hann taki sér fyrir hendur þegar hann flytur í bæinn. Hann viðurkennir þó að ekki sé ólíklegt að það verði tengt tónlistinni. Síðustu mánuði hefur Grímur til að mynda unnið að framgangi tveggja íslenskra hljómsveita, FM Belfast og Retro Stefson. Hann notaði sumarfríið sitt til að fara með FM Belfast í tónleikaferð úti í löndum.

Grímur hefur sem kunnugt er verið einn öflugasti tónleikahaldari landsins síðustu ár.

„Ég hef haldið ansi marga tónleika, bara á þessum bæjarstjóraferli eru þetta bönd eins og Sufjan Stevens, Blonde Redhead, Rufus Wainwright, John Fogerty, Eric Clapton, Tinderstics, Low, Lisa Ekdal, Jonathan Richman og Kim Larsen. Þetta er náttúrlega fyrst og fremst áhugastarf - ekki skilar þetta miklum peningum," segir Grímur sem hefur þó ekki gefið upp von um að hægt sé að flytja inn bönd til Íslands. „Maður er alltaf að reyna eitthvað," segir hann.- hdm