Óperudíva syngur með Bó

Jólatónleikar Björgvins Halldórssonar verða með glæsilegasta móti í ár en þrír erlendir gestir munu troða upp og flytja jólalög með sínu nefi. Tilkynnt hefur verið um Alexander Rybak og Paul Potts en síðasta púslið er breska óperusöngkonan Summer Watson.

Summer Watson er rísandi stjarna í óperuheiminum og hefur sungið í mörgum af stærstu óperuhúsum heims. Fréttablaðið náði tali af henni í Los Angeles í stutta stund í gær. „Ég hef aldrei komið til Íslands áður, ég hef alltaf heyrt að fólkið þar sé ákaflega vingjarnlegt og opið og að hverirnir séu einstaklega heilnæmir,“ segir Summer og á þar væntanlega við Bláa lónið. Summer kveðst líka hafa heyrt að landslagið á Íslandi sé einstakt og hún hlakkar mikið til að koma og syngja nokkur jólalög fyrir íslenska áhorfendur.

Summer er þekkt fyrir að vera mikil ferðamanneskja, hefur ferðast um Evrópu, Afríku, Asíu, Ástralíu og sungið víðs vegar um Ameríku. Þar að auki sigraðist hún á Mount Blanc-fjallinu og hyggst heimsækja Norðurpólinn á þessu ári. Hún segist því ekki hafa þurft að hugsa sig lengi um þegar boð um að koma til Íslands barst henni. „Ísland hefur alltaf verið ofarlega á lista yfir þau lönd sem mig hefur langað til að heimsækja þannig að það þurfti ekki mikið til að sannfæra mig,“ segir Summer.

Breska óperusöngkonan segist hafa fylgst ágætlega með íslensku tónlistarlífi. Björk er þar auðvitað fyrst á lista en Summer hefur unnið töluvert með upptökustjóranum Marius de Vries sem hefur tekið upp með íslensku söngkonunni. „Og svo voru Sykurmolarnir auðvitað frábærir. Ég hins vegar elska Sigur Rós og þá sérstaklega Hoppípolla-lagið þeirra. Draumur minn væri að halda tónleika og vinna að einhverri tónlist með þeim.“freyrgigja@frettabladid.is