Talibanar vilja semja frið -Washington Post

Washington Post segist hafa fjölmarga heimildarmenn fyrir frétt sinni. Þeir hafa allir óskað nafnleyndar þar sem viðræðurnar eru leynilegar. Í síðustu viku sagði hinsvegar David Petraeus yfirhershöfðingi Bandaríkjanna í Afganistan að hátt settir leiðtogar talibana hafi leitað til æðstu manna í ríkisstjórn Afganistans um viðræður.

Einn heimildarmanna blaðsins orðaði það þannig að talibanar væru mjög, mjög alvarlegir í tilraunum til þess að finna leið út úr stríðinu.

Það er þó ekki eintómur friðarvilji sem ræður för hjá leiðtogum talibana. Einn heimildarmannanna sagði að þeir vissu að það væri verið að reyna að setja þá til hliðar. Ennþá öfgafyllri öfl innan þeirra eigin raða væru í sókn. Þeir séu því vissir um að þótt stríðsreksturinn gangi vel séu þeir í tapstöðu.

Framtil þessa hafa Ómar og félagar hans hafnað öllum viðræðum nema erlendar hersveitir fari fyrst úr landi.

Ahmed Karzai forseti Afganistans hefur lengi lagt áherslu á að semja við talibana og búast má við að Bandaríkjamenn og aðrar NATO þjóðir tækju slíkri lausn fegins hendi.