Árásin í Kandahar var aðvörun til Bandaríkjamanna

Sprengjuárásirnar í Kandahar í gær sem urðu að minnsta kosti 35 manns að bana í gær voru aðvörun til Bandaríkjanna og NATO. Talsmaður Talibana lýsti þessu yfir í dag og var árásunum ætlað að fæla Bandaríkjamenn og bandamenn þeirra frá því að auka við liðsstyrk sinn á svæðinu til þess að hrekja Talíbana á brott.

Stanley McChrystal, hershöfðingi í Bandaríkjaher sagði á dögunum að til standi að herja sókn gegn Talíbönum á svæðinu en Kandahar er þeirra sterkasta vígi. „Við vorum að svara McChrystal hershöfðingja," segir talsmaðurinn sem sagði árásirnar sýna að Talibanar geti gert árásir hvar og hvenær sem er.