Dæmi um að kennari hafi verið stunginn með skeið

Ofbeldi nemenda í garð kennara getur orðið mjög hrottalegt og dæmi eru um að foreldrar barna taki þátt í eineltinu. Kennarar verða jafnvel fyrir barsmíðum í skólanum og þeir kvíða hverjum vinnudegi. Kennarasamband Íslands hyggst taka á málinu.

Í nýjasta tölublaði Skólavörðunnar, tímarits Kennarasambands Íslands, er ítarlega fjallað um kennara sem verða fyrir einelti. Ástandið virðist vera slæmt, meðal annars var kennari stunginn með skeið af nemanda.

Alvarlegustu eineltismálin koma inn á borð lögmanns Kennarasambands Íslands og er þar um að ræða nokkurn fjölda á síðustu árum.

„Þetta er allt frá alvarlegum barsmíðum upp í það að nemandi hafi stungið kennara með skeið í mötuneytinu," segir Erna Guðmundsdóttir lögmaður KÍ og BHM.

Erfitt er að benda á ákveðnar orsakir þessa eineltis en oft er um að ræða erfiðar heimilisaðstæður hjá nemendum, agavandamál eða læknisfræðilegar orsakir.

Viðbrögð foreldra nemenda sem beita kennara sinn ofbeldi eru æði misjöfn. Flestir foreldrar bregðast rétt við en aðrir neita að horfast í augu við vandann og verða jafnvel þátttakendur í eineltinu með því að hóta kennaranum og reyna að leggja starfsferil hans í rúst.

Þannig eru dæmi um að kennarar í litlum sveitarfélögum úti á landi hafi þurft að flytjast búferlum eftir að nemendur og foreldrar snúast gegn þeim.

Eru dæmi um að kennara séu hræddir að mæta í vinnuna?

„Já, það hafa komið upp þannig dæmi þar sem kennara verða hræddir, jafnvel veikir, og treysta sér ekki í vinnuna," svara Erna.

Nemendur á öllum skólastigum beita kennara ofbeldi. Kennarar eiga þess kost að tilkynna mál til barnaverndanefndar, eða til lögreglu ef nemandi er yfir fimmtán ára aldri. en þeir veigra sér gjarnan við því.

Vinnuumhverfisnefnd Kennarsambandsins hefur tekið þessi mál föstum tökum að undanförnu. Auk þess hefur Elín lagt til að viðbrögð verði samræmd á milli skóla.

„Í dag er það bara þannig að kennari má bara ekki gera neitt, í raun verja sig, þá fær hann á sig áminningu eða kæru," segir Erna um slæma stöðu kennara.