Kveikja í 22 flekum við Sæbraut

Listamennirnir Alisha Piercy og Óskar Ericsson munu kveikja í 22 flekum við Sæbrautina á Menninganótt. Þetta er þriðja verkið sem Óskar gerir í tilefni Menninganætur og voru hin listaverkin Þvottakórinn og loftlistaverkið Sóun.

Innblásturinn að verkinu er fenginn úr bók eftir Piercy þar sem aðalpersónan er týnd á sjó og býr til brennandi fleka úr braki til þess að vísa björgunarsveitum rétta leið. Piercy og Óskar kynntust fyrr í vetur þegar hann hélt einkasýningu í Montreal í Kanada og ákváðu í kjölfarið að vinna saman að verki. Alisha er búin að dvelja hér á landi í þrjá daga og segir einstaklega gaman að vinna með Óskari.

„Hann er alls óhræddur að takast á við stór verkefni og þetta verk er einmitt eitt slíkt. Það sem mér finnst einstakt við þetta verkefni er að það fer mikill tími í undirbúning en svo að gjörningnum loknum er ekkert eftir af verkinu sjálfu,“ segir Piercy.

Flekarnir eru búnir til úr gömlum brettum og yfir þrjúhundruð plastflöskum sem listamennirnir fengu lánaðar frá Sorpu. Verkið er einnig unnið í samvinnu við Slökkvilið Reykjavíkur og segir Óskar að verkið sé í raun æskudraumur að rætast. „Ég held það sé draumur hvers barns að fá að byggja fleka og kveikja bál þannig við Alisha höfum skemmt okkur vel við þetta,“ segir Óskar og bætir við að hægt sé að túlka verkið á ýmsa vegu.

„Þetta er mikil athöfn en við látum áhorfendur um að fylla í eyðurnar. Mér finnst þetta mjög dáleiðandi og öflugt auk þess sem þetta vinnur með þolinmæði áhorfenda.“

Gjörningurinn hefst með upplestri úr bók Piercy í Útúrdúr klukkan 22.00 og þaðan er haldið niður að höfn þar sem kveikt verður í flekunum. -sm