Lýst eftir fórnarlömbum nígeríusvindls - lentir þú í Fabian Watters?

Flestir ættu að kannast við fyrirbærið nígeríusvindl, enda hafa margir Íslendingar lent í slíkri svikastarfsemi eða fengið gylliboð um þátttöku.

Leikhópurinn 16 elskendur undirbýr nú leiksýningu sem verður frumsýnd í Kassanum í Þjóðleikhúsinu í ágúst. Í tenglsum við sýninguna vilja meðlimir hópsins setja sig í samband við fórnarlömb alþjóðlegrar svindlstarfsemi í von um að viðkomandi geti miðlað reynslu sinni og veitt innsýn inn í heim fórnarlambana.

Í undirbúningi sýningarinnar hafa Sextán elskendur kynnt sér ýmsar gerðir nígeríusvindls, eins og kemur fram í fréttatilkynningu: „Leikhópurinn óskar því eftir að komast í kynni við fólk sem orðið hefur fyrir barðinu á eftirfarandi tegundum svindls: almennu tölvupóstsvindli, wash-wash peningasvindli (stundum kent við „svarta peninga"), hvolpasvindli, svindli þar sem spilað er með tilfinningar fólks gegnum rómantík og ást, sem og svindli sem hinn þekkti nígeríski svikahrappur Fabian Watters hefur komið við sögu."

Nígeríusvindlið verður frumsýnt 20. ágúst næstkomandi í Kassanum í Þjóðleikhúsinu en fullrar nafnleyndar er gætt og ekki stendur til að þeir sem rætt er við komi fram í sýningunni. Þeir sem vilja deila sögum sínum eru beðnir um að hafa samband með því að senda tölvupóst á 16lovers@gmail eða hringja í síma 690 8609.

Meðlimir 16 elskenda eru Aðalbjörg Þóra Árnadóttir, Brynja Björnsdóttir, Davíð Freyr Þórunnarson, Eva Rún Snorradóttir, Friðgeir Einarssson, Gunnar Karel Másson, Hlynur Páll Pálsson, Karl Ágúst Þorbergsson og Ylfa Áskelsdóttir. Hópurinn hefur áður svindlað á fólki í gegnum ferðaskrifstofuna Íkea-Ferðir árið 2008 og með marklausri skriffinnsku í Orbis Terræ Ora á Listahátíð 2009.