Leita að elstu öldungunum

Japanar státa sig af meira langlífi en aðrar þjóðir. Strik var þó sett í þann reikning í síðasta mánuði þegar í ljós kom að hundruð manna, sem hafa verið á skrá yfir elsta fólk Japans, eru ýmist löngu látnir eða ekkert hefur til þeirra spurst svo árum eða jafnvel áratugum skiptir.

Athygli japanskra fjölmiðla hefur síðan beinst mjög að sögum um ættingja sem eiga að hafa reynt að svíkja út tryggingabætur. Einnig hafa birst fréttir um önnum hlaðna starfsmenn félagsþjónustunnar og dapurlegar lýsingar á einangrun aldraðra sem hægt og rólega hafa glatað öllum tengslum við samfélagið.

Umræðan fór af stað eftir að Sogen Koto, sem talinn var elsti karlmaður í Tókíó, 111 ára gamall, reyndist þegar lögreglan fór að kanna málið hafa verið látinn í 32 ár. Lík mannsins fannst í íbúð hans, en ættingjar höfðu jafnan sagt hann við hestaheilsu en lítt mannblendinn. Ættingjarnir sæta nú lögreglurannsókn.

Þetta varð til þess að lögreglan hóf leit að öðru fólki, sem talið var á lífi í hárri elli. Sú leit skilaði hrollvekjandi niðurstöðum. Þannig reyndist Fusa Furuya, kona sem talin var 113 ára gömul og þar með elsta konan í höfuðborginni, hvergi finnanleg. Í borginni Kobe hafa yfirvöld einnig árangurslaust reynt að hafa uppi á meira en hundrað manns, sem taldir voru eldri en hundrað ára, þar á meðal einni konu sem talin var 125 ára.

Fullvíst þykir að skrifa megi meint langlífi þeirrar konu, sem og þriggja annarra íbúa Kobe sem taldir voru eldri en 120 ára, á reikning embættismanna sem kastað hafa til höndunum þegar kom að skráningu íbúanna.

Samkvæmt opinberum skýrslum eru 40.399 manns í Japan orðnir hundrað ára eða eldri. Alvarlegar efasemdir hafa nú vaknað um réttmæti þessara upplýsinga.

„Fjölskyldurnar, sem eiga að vera nákomnastar þessu aldraða fólki, vita ekki hvar það er niðurkomið og hafa í mörgum tilvikum ekki einu sinni haft fyrir því að biðja lögreglu að grennslast fyrir um það,“ segir í leiðara dagblaðsins Asahi.

Í sama blaði er bent á eina skuggahlið þessa máls: Ef dauðsföll eru ekki tilkynnt til stjórnvalda halda lífeyrisgreiðslur áfram að berast og það virðist í sumum tilfellum hafa hvatt ættingja til þess að skýra ekki frá því þegar aldraðir falla frá.

gudsteinn@frettabladid.is