Veðurstofan varar við stormi

Veðurstofa Íslands varar við stormi austantil á landinu og á Miðhálendinu í nótt og fram eftir morgundegi.

Ferðafólki sem hyggur á ferðalag á milli landshluta, einkum norðan- og austanlands, síðdegis og á morgun er bent á fylgjast grannt með fréttum af veðri og færð.

Rjúpnaveiðitíminn hófst á miðnætti en menn eru hvattir til að fara sér hægt þessa helgina þar sem spáð er vonskuveðri.

Slysavarnafélagið Landsbjörg sendi frá sér tilkynningu í dag þar sem bent er á að undanfarin ár hafa björgunarsveitir ítrekað verið kallaðar út til að leita að rjúpnaveiðimönnum. Þeim, sem öðrum, er því bent á að fylgjast vel með veðurspá áður en haldið er út fyrir bæjar- og borgarmörk.

Á laugardag er búist við norðaustan hvassviðri eða stormi við austur- og norðurströndina ásamt talsverðri ofankomu. Einnig má búast við svipaðri eða meiri veðurhæð á fjöllum. Færð getur spillst á skömmum tíma og lítið eða ekkert ferðaveður verður víða um land.

Sunnantil á landinu verður heldur hægari vindur og úrkomulítið. Á sunnudag dregur úr vindi og ofankomu fyrir norðan og ætti víðast hvar að vera komið skaplegt veður seinnipartinn.