Eldfjallið í Kópavogi

Þríhnúkar nefnast þrír litlir hnúkar, sem standa á hálendisbrúninni skammt vestur af Bláfjöllum. Undir gíg norðaustasta hnúksins leynist tröllaukið holrými, sem gerir Þríhnúkagíg að einu stærsta og merkilegasta náttúrufyrirbrigði sinnar tegundar á jörðinni. Óhætt er að telja að hrikaleiki gígsins muni laða að ferðamenn og verða eitt af sérkennum Íslands líkt og Gullfoss, Geysir og Bláa lónið.

Segja má að aðgengi að Þríhnúkagíg sé jafn hrikalegt gígnum sjálfum. Náttúran er hér í meginhlutverki og afar mikilvægt er að svo verði áfram. Það er því í senn áhugavert og krefjandi verkefni að gera náttúruundrið í Þríhnúkagíg aðgengilegra ferðamönnum. Áætlað hefur verið að það muni kosta um 900 milljónir króna en engir sýningarhellar eru hér á landi, þótt ótrúlegt megi virðast. Slíkan sýningarhelli skortir sárlega og má reikna fastlega með að einn sérstæðasti hellir heims, staddur í jaðri höfuðborgarsvæðisins, muni draga að lungann úr þeim ferðamönnum sem sækja Ísland heim. Eitt stærsta verkefni ferðaþjónustunnar er að lengja íslenska ferðaárið. Þríhnúkagígur getur lagt þýðingarmikið lóð á þá vogarskál, með því að styrkja markaðssetningu á borgar- og ráðstefnuferðum hingað til lands.

Þríhnúkar, sem eru í lögsögu Kópavogs, tilheyra Bláfjallafólkvangi sem stofnaður var með friðlýsingu árið 1973. Bláfjallanefnd fer með stjórn fólkvangsins, en alls 13 sveitarfélög á suðvesturhorni landsins eiga aðild að rekstri hans. Í ljósi þessa er eðlilegt að Kópavogur taki frumkvæði og ýti þessu verkefni úr vör í samstarfi við hin sveitarfélögin innan Bláfjallafólkvangs ásamt einkaaðilum. Þetta yrði verðugt samstarfsverkefni einkageirans og hins opinbera þjóðinni til heilla.

Þríhnúkagígur er náttúruundur í nágrenni höfuðborgarsvæðisins sem fáir hafa vitað af þar til síðustu ár. Árni B. Stefánsson augnlæknir hefur að öðrum ólöstuðum verið sá sem hefur verið hvað ötulastur við að rannsaka hellinn og koma honum á framfæri ásamt þeim skilyrðum að tryggt verði að gígurinn og umhverfi hans verði varðveitt. Það er nauðsynlegt að þetta mikilvæga verkefni sé unnið af hófsemi og virðingu fyrir náttúrunni og þessu einstaka náttúruundri.

Höfundur er forseti bæjarstjórnar Kópavogs.