Siggi stormur aftur orðinn fréttamaður

„Nú er ég orðinn fréttamaður aftur," segir Sigurður Þ. Ragnarsson, betur þekktur sem Siggi Stormur. Þeir sem fylgdust með fréttaútsendingum frá ríkisráðsfundinum á Bessastöðum í gær spurðu sig margir hvað Siggi Stormur væri að gera á Álftanesinu. Blaðamaður Vísis hafði samband við Sigga til að fá svarið við þessari áleitnu spurningu.

„Ég starfaði sem fréttamaður á RÚV fyrir mörgum árum og er nú aftur kominn í fréttamannastarfið ásamt Hauki Hólm á Útvarpi Sögu," segir Siggi. Haukur hóf fyrir skömmu störf á stöðinni sem yfirmaður fréttadeildar og fékk Sigga nýverið til liðs við sig. Siggi er þó aðeins í hlutastarfi á Útvarpi Sögu enda sinnir hann einnig starfi veðurfréttamanns, nú á DV.

„Ég er búinn að starfa við fjölmiðla í sextán ár og eftir að ég hætti á Stöð 2 tók ég mér smá tíma til að hugsa um hvað ég vildi verða þegar ég yrði stór," segir Siggi. Til að byrja með starfaði hann áfram sem veðurfræðingur fyrir ýmsa fjölmiðla, þar á meðal Skjá Einn. „En fréttamannabakterían fer ekki úr manni svo glatt."

Sigga finnst ákaflega ánægjulegt hversu fjölbreytilegt starf hans er nú þar sem hann vinnur fyrir ólíka miðla. „Þó að þetta séu á sinn hátt samkeppnisaðilar þá skarast ekki mín störf fyrir þá," segir hann og bendir á að forsvarsmenn Útvarps Sögu og DV séu vel meðvitaðir um störf hans fyrir hinn miðilinn.

„Þetta er ógurlega fjölbreytt og ég kann vel við mig í þannig umhverfi. Í gær var ég að sinna fréttamennskunni fyrir hádegi. Ég var með morgunþáttinn minn á Útvarpi Sögu og fór síðan á Bessastaði," segir Siggi sem þó var ekki að mæta til síns fyrsta ríkisráðsfundar því á árum áður fór hann líka á Bessastaði vegna slíks fundar sem fréttamaður RÚV.

„Mér hefur aldrei líkað stöðnun á neinu sviði og er alveg eins og blóm í eggi núna," segir Siggi hlæjandi. Hann hefur líka enn gaman af því þegar hringt er í hann frá Bylgjunni og hann spurður um veðrið. „Mér finnst alltaf gaman að heyra frá Þorgeiri og   Kristófer á Bylgjunni," segir Siggi.

Hann skiptir léttilega yfir í gír veðurfréttamannsins. „Undir Hafnarfjalli koma núna hviður upp í allt að 40 metra á sekúntu. Þetta er hættulegt fyrir menn með aftanívagna. Þegar svona veður er hefur maður puttann á púlsinum. Það er ekkert grín að bera ábyrgð á veðurspá þegar veðrið er svona. Vindurinn er dauðans alvara," segir Siggi en kveður á léttari nótum: „Þeir sem búa á austur- og norðausturlandi njóta veðurblíðunnar núna. Þar er bara majorkaveður. En ég get því miður ekki farið til þeirra núna. Ég kem í heimsókn síðar."